يبني الضيعتني بضيعتك مني....دوهني زماني بيك دوهني

*****

دوهني زماني وتاه مني الراي..... يلب حشاي يالمنگطع من حشاي

يماي العين عگبك نزل بيها الماي ...... ظني چان بيك وخيبت ظني

ظني خاب يوليدي وگطعت الياس..... يعصابة الراس البيك رفع الراس

ينوماس الچسب بالغانمه النوماس..... إغتنمتك والمنايه إغتنمتك مني

المنايه إغتنمتك مني وبعد هيهات.....ترد يبني ويرد ليّه زماني الفات

يسباح الچبد عودك تلوى ومات.... وساعات المنايه بيك چادني

چادتني المنايه ومالي حيل الچود .... حيلي وياك راح ومن تعود يعود

يعگل الراس وياك العگل مفگود.... سودني هوى فرگاك سودني

سودني هوى فرگاك واختليت....على فراگك يجاسم دم دمع هليت

العمد لو طاح من البيت طاح البيت.. وانا بيتي إنهدم وعلى العمد وني

اونن وانتحب وشجي حمام الدوح.... وعلمت الورگ والدلم فن النوح

روحي وياك راحت درد ليّه الروح.... لمك آه يروحي شبعدك عني

عني شبعدك يلبالگلب مرعاك.....بايام الحمل گلبي شكثر باراك

يجاسم من عگب حملك ليالي رباك....حاربت الرغد والنوم خلني

حاربت الرغد يبني ولذيذ النوم....واهز مهدك يجاسم وارجى بيك علوم

وادور يوم بيك وخوش هذا اليوم.....صابني النوايب بيه صابني

صابني النوايب والسهم جراح....لوى هرش الگلب وتگطع السباح

ردت يرتاح گلبي بيك خوش ارتاح... وخوش ذخرتك لعازة كبر سني

لكبر سني ذخرتك يولدي وارجاك.... من تطلع تجيب الموزمه وياك

تسلاني النوايب يولدي وما اسلاك..... شلون اسلاك وايامك يذجرني