محبوب محبوب ... و بحبك انذوب

و بقلبي مكتوب ... اسمك يمهيوب

كل حبي و هيامي ... بسمك يا إمامي

هالليله الصدر مشروح و أحجي بكل رحابه

أعزف أعذب الألحان و المهجه ربابه

مسرور الكَلب و اقريت موال و عتابه

بميلادك يمن يهواك وحي الله و كتابه

أهواك أهواك ... و بروحي ذكراك

كل فكري وياك ... ما لحظه أنساك

و اتعين وسامي ... باسمك يا إمامي

وافاني بشير الشوق و اتوجه اليه

بشرني و نطيت الروح للمولد هديه

أشعر جن نجوم الليل حطهن بين ايديه

غازلت السمه و غنيت لعيون الثريه

ألحان ألحان ... حبك يسلطان

كلما بلكوان ... وياي فرحان

و اتعطر كلامي... بسمك يا إمامي

بشرني البشير وراح للمحفل دعاني

جيت المحفلك محفوف بالحب و الأماني

بسمك يالرضه اختطيت آيات التهاني

كلما بالنفس ألحان رددهن لساني

أنغام أنغام ... ما إلهن أرقام

بيك المحب هام ... يا نسل لكرام

كل شوقي و غرامي... بسمك يا إمامي

يا موجة بحر طفاح بالحب و المحنه

مشغوف المحب و بغير اسمك ما تغنه

بحبك يالرضه الدلال مسرور و تهنه

هالليله المحب بالشوق للمحفل تعنه

وياي وياي ... فرحانه دنياي

بحبك يمولاي ... ظل ثابت الراي

و أسرار الاسامي... بسمك يا إمامي

يا عاشر بدر معصوم تسطع بالكرامه

يا ثامن إمام و بيك مصيونه الإمامه

نهجك للبشر وداه عد شاطي السلامه

و انته بجبهة التاريخ للمؤمن علامه

أسرار أسرار ... تتوهج أنوار

يالمولدك صار ... للعزه تذكار

هذا آنه اعتصامي... بسمك يا إمامي

يا نسمة أمل دنياي يا زهرة ملاحه

جفك يا محيط الكون منبع للسماحه

من علمك كتبنه اعلوم دستور الفصاحه

دنيه و آخره الوالاك يتحقق نجاحه

معصوم معصوم ... ميلادك اليوم

بعيوني مرسوم ... و بقلبي مختوم

أختم هالختامي... بسمك يا إمامي