بالخيم فرحه وبشاير... بالحرب خيل وعساكر

وانت يا جسام حاير ...بين الاثنين... تتجه وين

هذي لحضه البيها يتحدد شعارك

امك انا وانتظر اسمع قرارك

هذا ياشبل الحسن يوم اختيارك

انت واعي ولازم تحدد مسارك

بالخيم زفه وهلاهل بانتظارك

والحرب تتنطرك تعلن دمارك

زفه وشموع وهلاهل ...معركه وسيوف وعواسل

لو نزفك لو تقاتل... هما دربين... تتجه وين

يابني انا امك نصائح ارد ازيدك

بالمهم يا جاسم اتفكر اريدك

يابني هالحنه التخليها على أيدك

تنمسح من بعد فتره وما تفيدك

لا كن الحنه التصير بدم وريدك

هذي تبقى خالده وتضمن رصيدك

لو تضل بالفرحه هايم... لوتضل عالقبره نايم

وانت شتقرر يا جاسم... بينك امرين... تتجه وين

عندي كلمه ثانيه الساني حجاها

وانت فاهم ما يفوتك محتواها

هذي شمعة عرسك اليسطع ضواها

لو تهب نسمة هوى تخمد سناها

شمعة التضحيه المواحد طفاها

خالده وتتنور الدنيا بهداها

من زفافك شمعه عندك ...شمعة الميدان مجدك

ياضوى الاكثر يشدك... تزهي نورين... تتجه وين

الليله ونه حنه ينجمعن سويه

الليله شمعه دمعه بارض الغاضريه

يابني يامن فرقت تصعب عليا

عرش زفت عرسك انصبته بديها

تريد هذا العرش والزفه الزهيه

لو ترجح مهرك وسرج المنيه

حوفتك عرشك نصبته... والمهر بيدي سرجته

يابني وشتتختار انته... دربك منين ...تتجه وين

يا نجم سعدي وتغار عليك شمسك

يا حلم عيني وجفن عيني يحرسك

يا غصن النبت بين حشاي غرسك

قول واحجي شتطلب وش تريد نفسك

تريد تلبس للزفاف اثياب عرسك

لو تريد الجفن يصير لبسك

تريد ثوب العرس مني... لو تريد الكفن يابني

قبالك الثوبين ذني ...ياضوى العين... تتجه وين

يابني لو بيدي بوسط قلبي اضمك

انت غالي مو رخيص وانا امك

للحرب مو هينه يا جاسم اسلمك

ولاهي سهله قبالي مني يطيح جسمك

لاكن الي خلاني استوهن بدمك

من شفت يابن الحسن محتار عمك

يابني هذي مو صفاتك... عالوفى تفضل حياتك

ادري ما تقبلها ذاتك... وادري بعدين... تتجه وين

ودع امه وقاصد لسوح الحرايب

روع بهمة علي صفوف الكتأيب

مثل وثبة حيدر على القوم واثب

ساعه لن جسمه بمسيل دماه غايب

رمله صاحت صيحه من كهف المصايب

مبارك ثياب الكفن يابن الاطايب

مبارك عليك الشهاده ...حصلتها بكل اراده

ودخلت باب السعاده ...وعرفت زين... تتجه وين