حضر بالطف رسول الله وتحير ** فگد جاسم أشد لو فگد الأكبر

يدير العين هادينه ** فگد بدرين هادينه** فگد جاسم أشد لو فگد الأكبر

حضر بالفاجعة الهادي ** حزين بلوعته ينادي ** أجيت أرد أحضر اولادي **وقعد بين الجثث ينحب

تفجر سيل عبراته ** حفر بدموعه وجناته ** زفير النار حسراته **ضميره بالحزن يلهب

قعد للأكبر ينظره ** يشوف بهامته الطبرة ** يصد لجاسم بعبرة ** يشوفه بالدمة مخضب

يحاجيهم وهم عالغبرة صرعة ** غدى عليهم يصب دمعة على دمعة

يتوجه وين هادينه ** فقد بدرين هادينه** فگد جاسم أشد لو فگد الأكبر

حضن جثة علي الأكبر ** يقله يا بني ما أقدر ** أشوفك بالدمه معفر ** دهتني مصيبتك يا بني

كلف يا الأكبر مصابك ** صريع وبالدمه خضابك ** يمينه أنشله بصوابك **تراه بقلبي صوبني

من أشوفن وجه الدامي ** تهيج لوعة آلامي ** شباب وتنذبح ضامي ** شعالامك ما تجاوبني

حنه ضلوعه ويشم طبرة جبينه ** يذوب الصخرة من جمرة ونينه

ولاه البين هادينا ** فقد بدرين هادينا** فگد جاسم أشد لو فگد الأكبر

وقعد يم جاسم يشمه ** وحنه ضلوع الصبر يمه ** ويخضب شيبته بدمه **ويقله يا بني يا جاسم

أجيت أمسح ترب خدك ** وأضمد بالدمع جبدك ** شجرى لك يا بعد جدك **يا ريحانة بني هاشم

يا ضي الي بيه تصد عيني ** على دربي يدليني ** شجرا لك ما تحاجيني ** وتنشف مدمعي الساجم

تغض وسفه يا جاسم عن جوابي ** يعل لأجلك جرح لوعة مصابي

حمل جرحين هادينا ** فقد بدرين هادينا** فگد جاسم أشد لو فگد الأكبر

التفت للأكبر بونه ** شطر مجرى الدمع منه ** يقله بيش أهيدنه ** جرح جبدي الي يسافح دم

وأنت يا علي يمي ** أشونك جسم مدمي ** يصب من منحرك دمي **مو هو جسمي الذي تخدم

يا نجمة من السماء طاحت ** يا دمعة من الجفن ساحت ** شكثر روحي الك ناحت **وما تسمع بواجي الهم

سهم فقدك شعب قلبي ورماني ** حزن جاسم مثل حزنك دهاني

إنرمه بسهمين هادينا ** فقد بدرين هادينا** فگد جاسم أشد لو فگد الأكبر

يا جاسم يا هوى الي يسري ** شفت دم ركبتك يجري ** توجيت بجبل صبري ** يا ضي عيني ال أصد بيها

لزفافك جيت يا عيدي ** جبت لك شمعتك بأيدي ** بعد ما أدري يا وليدي **هوى العاصف يطفيها

علقتها بجمرة الدمعة ** شلتها بروحي منفجعة ** يا جاسم قوم هالشمعة **على قبر الحسن خليها

يا من فقدك عصف ريح المصايب ** سواد الهم طفح غيب النوايب

إنفجع بإثنين هادينا ** فقد بدرين هادينا** فگد جاسم أشد لو فگد الأكبر

إلتفت للأكبر يقله ** عليك الحزن ما مله ** البيابي مدمع تهله ** على أبوك الي بقه وحده

أبوك حسين يا الأكبر ** وحيد وحاطته العسكر ** رعاك الله لون تقدر **تقوم العسكر ترده

من أشوفنه يهب نوحي ** ويهيج ساكن جروحي ** يا الأكبر هاك أخذ روحي ** وأنهض للعزم شده

النبوة انصابت لحال الامامة ** مصيبة والفلك غير نظامه

حزن الحسين هادينا ** فقد بدرين هادينا** فگد جاسم أشد لو فگد الأكبر

على جاسم روحه مهمومة ** قعد يتمثل رسومه ** يقله دونك الحومة ** يا ريتك تنظر وتسمع

تقوم لعمك تشوفه ** عليه الجيش بصفوفه ** هجم وملوحة سيوفه ** عليه رماح تتشرع

وسف يخفي الأجل ونك ** جواب أردن صرت منك ** أطن يا بن الحسن جنك ** عنت لك نومة المصرع

يا من عرسك صبح عرس المنية ** الك طابت رمال الغاضرية

إله مصابين هادينا ** فقد بدرين هادينا** فگد جاسم أشد لو فگد الأكبر