يصعب علينه اغيابه و نجري الدمع لمصابه

جن و إنس مفجوعه جفن العقيده دم تسيل ادموعه

اعله الصادق الدين انرجن بفروعه و بفقده ظلينه نعيش ابلوعه

جمرة حزن لهابه نجري الدمع لمصابه

الليله الإمام الصادق بيا حاله خل المصابه دمعتك هماله

هالليله بالسم انمرد دلاله و ملتمه يمه الليله كل اعياله

ادموع الحزن سجابه و نجري الدمع لمصابه

صادق العتره ايلوج من اسمومه و بعيونه أشباح الأجل مرسومه

صابر عل حكم القدر و اهمومه يوم و عله الإسلام أصعب يومه

و العلم غلق بابه و نجري الدمع لمصابه

سفك الدمه أصبح شعار ابكل دور زمرة بني العباس حكمت بالجور

لا دين عندها لا قيم لا دستور سمت الصادق تالي بيد المنصور

ضيعوا كل أتعابه و نجري الدمع لمصابه

و اوليده حاضر بالمصيبه يمه من بعده قله اتقود هاي الأمه

و الكاظم ابدمعاته غسل جمسه شيّعه ابصبره و قام يشرح همه

و بقلبه ظل اصوابه و نجري الدمع لمصابه