بيك هالليله المله اتهنيني امبارك اعروسك يسلوة عيني

يبني و الأكوان من جن و إنس و الملك هاليوم تشهد هالعرس

بالهلاهل و الصواني تنترس املبس و انه الفرح يمليني

يبني و يشعلون اشموع الفرح لجلك و يملون بالحنه القدح

من صواني الفرح جن عطرك طفح منها أشمك و أنشرح تدريني

اتعيد يا جسام عرسك شيعتك يالولد كل عام تشعل شمعتك

تالي بالدمعات تكمل فرحتك منه قلبي ينشحن بونيني

أنشد الوادم أناشد للمله المن الدمعات صارت هامله

و انت لعروسك مشيت الكربله قلت يمه بالخيم تانيني

يمه تانيتك و أدرو بالخيم عنك انشدت العقيله و الحرم

وقع حيلي يبني دلالي انهدم من شفت يبن الحسن ناسيني

و آنه ظل أتناك و أتنه اويَ الدهر أبد ما أنساك و اقليبي استعر

ابنار هجرك و أنتظر قرص القمر يشع من وجناك و اتسليني

مدري و اتنسيك يمه اعروستك أمك و بالدمعه أتنه رجعتك

طال يمه الشوكَ طالت غيبتك و انت تدري فرقتك تاديني

خوفي و الزفوك لعروس العمر بالدرب غدروك أرباب الغدر

حجرتك خوفي أصبحت يبني القبر و ثوب عرسك جفن دمعة عيني