داحي الباب اشلون انصاب اشلون انصاب داحي الباب

حيدر اليحرس جاره شاعت ابفضله اخباره

اشلون انصاب داحي الباب

حيدر التشهد له الانس ويه الجان هو النبأ وأم القرى والميزان

آدم بيوم العصه الباري الرحمن توبته انقبلت بأسم داحي البيبان

نوح النبي لمن نجى امن الطوفان بأسم الصميدة ندب رب الأكوان

حيدر البرد عالخليل النيران يونس بأسم حيدر نجى من الحيتان

هالاعجاب بيها اسباب بيها اسباب هالاعجاب

محد وصل اسراره شاعت بفضله اخباره

اشلون انصاب داحي الباب

مستودع الكل الحكم والأسرار بس الله يعرف علي وطه المختار

ما أدبر بيوم الشدايد كرار بيمينه يلهب غضب سيف الفقار

عمرَ بن ود الجان فارس مغوار ضربة علي خلته امتيه الأفكار

هالخلق لو يجمعها حب حامي الجار رب العرش جا ما خلق إلهم نار

ماكو اكتاب بغير حساب بغير حساب ماكو اكتاب

يوم الحشر واخطاره شاعت بفضله اخباره

اشلون انصاب داحي الباب

بيعة علي كلما نضحي اعليها ما نخضع ونبقه نتمسك بيها

البضغة علي بالمحشرانلاقيها ونشوف ياعذر الذي ينجيها

تالينا أشرف وعد لوتاليها صوت المنادي باجر ايناديها

فازت التبعت حيدره واليها للحوض خل تقصد علي يرويها

مي جلاب للأطياب للأطياب مي جلاب

كل قلب تبرد ناره شاعت بفضله اخباره

اشلون انصاب داحي الباب

شيعيتك احنا وانته بينه اعرف زين من المهد هذا العهد يابو حسين

جلمتنه وحده وأبد ماتصير اثنين لا بينا ياحيدر اليحجي الوجهين

عن درب حبك ماتزل الرجلين للندم مايوم الصفقنه الجفين

ياعلي وكلما يقصي ويانه البين حبك ابكل رقبة يظل ذمَّة ودين

سر و انساب للأصلاب للأصلاب سر و انساب

حبك وكل هاي آثاره شاعت بفضله اخباره

اشلون انصاب داحي الباب

يالتحضر الينخاك حاشه ترده ننخاك ياحيدر وطحنه ابشدة

وبكل قلب خطر الضيم و سده والصبر ما عونه طفح واتبده

والوضع ما ينحزر جزره ومده كسر الخواطر تدري يصعب شده

والشيعي غيرك يبو حسين اشعنده طحنه ابظلم انهض و سيفك جرده

عدنه اعتاب اعتاب جم امصاب عدنه اعتاب

شخصك يا راعي الشاره شاعت بفضله اخباره

اشلون انصاب داحي الباب

حامي الدخيل إنت الذي يسمونه و عند الشدايد فضلك ايوصفونه

ردات لهفات الذي ايقصدونه و اليقصدك حاشه تخيب إظنونه

جيرانك إحنه تقبل ايذبحونه لذنه ابضريحك لمن اتولونه

جا ترضه دمنه ابقبرك ايسفكونه حته اليزورك قاموا ايمنعونه

بين أذياب انعيش إرهاب انعيش إرهاب بين أذياب

و صحنك حضن زواره شاعت بفضله اخباره

اشلون انصاب داحي الباب