لا تسل ماذا جرى..... إنهُ دمي جرى

و إلى اللهِ المصير

آنه حيدر من وجودي يفترع أصل الإمامه

بسيفي دين الباري ثبتت قاعدة شرعه و نظامه

و آنه أخبرني محمد عن أجل عمري و ختامه

و الإشاره إعله الكواكب ينرسم جرحي علامه

و بقى يامٍ دمي ..... في عيونِ الأنجمي

هكذا قال البشير ..... و إلى اللهِ المصير

هذي آخر ليله جمعت كل علامات النهايه

و السحر لمم نجومه ينتظر فجر المنايه

ودعة أطفالي و آنه امطوق بموج الرزايه

و اطلعت من داري أمشي و الأجل يمشي ورايه

قاصداً فرض الصلا ..... آنَ لي أن أقتلا

ها هو الفرض الأخير ..... و إلى اللهِ المصير

اتوسطت محرابي و أنظر مشهد العالم تغير

كبرت للباري و اسمع كل ملك ويايه كبر

أحس كل ذره ويه صوتي رددت اللهُ أكبر

و جن يخاطبني ضميري اتهيئ الموتك يحيدر

و إذا قلت متى ..... ها هو الموت أتى

مسرعاً جاء يسير ..... و إلى اللهِ المصير

تمت السجده الأخيره گبل ما تكمل صلاتي

لن أحس الطبره صابة هامتي و ختمت حياتي

دمي خضب شيبي و آنه اموسد بخطة مماتي

و اهتفت فزت و رب الكعبه ما تهمني وفاتي

و كأني بالسما ..... تذرف الدمع دما

و لها دمعٌ غزيز ..... و إلى اللهِ المصير

اتوسدت محرابي و أسمع بالسمه يصيح المنادي

انهدمت أركان الديانه و ينعه جبريل و ينادي

انفصمت العروة الوثقى و فرحة اكلوب الأعادي

هذا حيدر طاح مرمي امصوب بسيف المُرادي

هكذا كان الندا ..... هُدت أركانُ الهدى

إنه خطبٌ مرير ..... و إلى اللهِ المصير

طبرتي تنزف دماها ووجهي من دمي ايتخضب

القوم شالوني و اسمع بالسمه الأملاك تنحب

ما إلي إعله النهضه قدره من ألم راسي التصوب

جني مو ذاك اللي أرده ابن ود و جِتل مرحب

هدني ثقلُ الأسا ..... و بيه السيفُ قسا

فغذى وجهي عفير ..... و إلى اللهِ المصير

اتوجهوا بيه إعله داري لن تلقوني بنيني

الحسن حاضر عن يساري و صار الحسين بيميني

دمعة أم كلثوم تجري و هيجت جمرة ونيني

زينب بجفها اجتني تمسح الدم عن جبيني

بعد يومين انقضت ..... هكذا روحي مضت

نحو خلاقٍ قدير ..... و إلى اللهِ المصير