فكري احتار ..... شنهو الصار

حيدر طايح بالمحراب ..... لو راس المختار انصاب

فكري احتار ..... شنهو الصار

شبيه الطير من يفزع بالظلمه افزعت مرعوب

شفت فوق الأرض كوكب وقع بالنايبه مصحوب

صحت هذا الوقع حيدر و شيبه بالدمه مخضوب

و لو هذا رسول الله بمحرابه وقع مصيوب

منهو الطاح ..... و الدم ساح

صابوا هامت داحي الباب ..... لو راس المختار انصاب

أناشد ما حصل واحد يجود اعليه بجوابه

بگيت امدوهن و فكري يجول بعالم امصابه

ما أدري محمد طاح و توسد وسط محرابه

لو هذا علي الكرار طايح و الدمه اخضابه

بالآهات ..... و العبرات

أنشد و أصرخ حيدر غاب ..... لو راس المختار انصاب

اسمعت بين الگلب و الروح حديث ايفجر العبره

الگلب للروح يخبرها يقلها طاح أبو الزهره

لن روحي الحزينه اتقول بعيده عنك افكره

هذا الطاح أبو السبطين وقع و بهامته الطبره

قلبي اينوح ..... ويه الروح

الليله اتصوب ليث الغاب ..... لو راس المختار انصاب

لنها اتجاوبه روحي تقله يا قلب اسمع

انته الگلت هادينه صفت المحراب اله مصرع

ما ظن يا گلب هذا دم المصطفه ينبع

هذا اللي جره اعله القاع دم المرتضه الأنزع

و بهالحال ..... يا دم سال

دم حيدر هالصار اخضاب ..... لو راس المختار انصاب

صغت روحي و يحاجيها الگلب و بلوعته اتفطر

يگل الها و بشرايينه لهيب النايبه يسعر

أخبرج هذا بالمحراب جسمه انصرع مو حيدر

هذا دم رسول الله جره و من طبرته اتفجر

من انين اليوم ..... تجري ادموم

حيدر هالمصيوب اصواب ..... لو راس المختار انصاب

لا روحي ولا گلبي عرفوا مصدر الأحزان

النتيجه واضحه و هالحال ما يحتاج اله تبيان

لا دم الوصي هذا و لا دم سيد الأكوان

دم المصحف اليجري و صابوا هامت القرآن

و التنزيل ..... دمه ايسيل

صابوا تنزيل الوهاب..... لو راس المختار انصاب

الليله طبروا القرآن و الآيات دمها ايسيل

هذا مو علي اتصوب صابوا مصحف التنزيل

نحيب الكون لمصابه يرتل بالحزن ترتيل

عله امصابه الزبور اينوح و التوراة و الإنجيل

بالمضمون ..... ما يدرون

صابوا من وحي الله اكتاب ..... لو راس المختار انصاب