آنه و الخلافه اتريد راعيها يحيدر يا شخص غيرك يكفيها

أفكر يا علي و حاير ابها التفكير أفكر يا هو غيرك للخلافه ايصير

يحيدر سلطة الأمه خطرها اجبير غلط يا هو اليجي يتحكم اعليها

يحيدر أمر تعيينك نزل فرضه من الله و رسوله اشلون نتعرضه

اذا بالله و رسوله الناس ما ترضه عجب كل العجب شنهو اليرضيها

عليك اللي تقدم بيمن اتقدم يحيدر منك أشجع هذا لو أعلم

اذا بالأكثريه يدعي اتحكم و مرتك ميت ألف واحد شهد بيها

يحامي الجار ليش القوم ما يرضون تصير انت الخليفه و تلزم القانون

تريد أموال تجبي و بيك مي يأمنون و لو نيتك اتريد اقصور تبنيها

لا والله أبد متفكر ابها الراي و لا هي اتمر عله بالك يحيدر هاي

لجن هذي زعامه و حكم ليهم جاي و من يرضه الزعامه الغيره ينطيها

يحيدر خذلوا الإسلام من خذلوك يحيدر و المصالحهم هدف خلوك

ووقت المشكله العلميه يتعنوك و القسمه تقسمها بأياديها

السقيفه عينتهم و أخذوا استقلال و مو لجل الشرع و الدين و الأعمال

لجن تعيينهم صار اعله بيت المال و غدت لغراضها الأموال تجبيها

و انت تنعزل يا علي و تتخلف و غيرك بالخلافه اعليك يتخلف

و ما نأسف عله الدنيه لجن نأسف عله البلحداها غير حاديها

اشلون الحبه الله الوادم اتكرها اشلون الآية التبليغ تنكرها

اشلون الهل أته و عمه تغيرها و هي نزلت ابحقك كل معاليها

محمد بذل للأمه مساعيه يصير يعوفها تخبط ابعشويه

محمد يآمر الوادم بلوصيه يصير ايموت و الأمه ميوصيها

و يقلون البعض نعترف بالواقع علي هو الخليفه و ما إله امنازع

لجن العرب ما ترضه العلي اتبايع السبب موتوره منه و جان داميها

ليش العرب موتوره امن أبو الحسنين و جي دمر الكفار ابدر و احنين

لون ما سيف حيدر يا هو يعرف دين و يا هو سنت الإسلام يحييها

و بعد خل نجي و نتسآئل بإستفهام و عن ذوله القتلهم كفر لو إسلام

لو ذوله كفر عبادة الأصنام ليش القوم تتأسف يضحيها

يحيدر بعد عندي ابها البحث مطلب وابهذا الأمر كل عقل يتعجب

و بعض الناس بيك اتقول انت الرب و بعض وادم مترضه اتصير واليها

يحامي الجار بيك اشسوت الأسلاف و ما أجرت اوياك العدل و الإنصاف

فضائل الك تشبه للشمس تنشاف و عين الشمس من يقدر يغطيها