سلبت النوم من عيني .... يالأكبر گوم حاجيني

حرت لمن شفت جسمك .... أعوفك لو أظل يمك

يالأكبر گوم حاجيني

تعبت اسنين بالأكبر إعله حر و برد ربيتك

إفرشت لك بالمهد روحي إسهرت و بروحي غطيتك

أفز إشما تفز بالليل و ليالي اشكثر باريتك

إسهرت و انته بلذيذ النوم .... و عله مهدك دليلي إيحوم

يا طيف إعله الجفن مرسوم

حلم و إرسمتك بعيني.... غصن و إسنين تانيتك

أنوگن بيك بين إيدي .... سهرت إعليك يوليدي

و غصن و مهجتي إتشمك .... أعوفك لو أظل يمك

يالأكبر گوم حاجيني

غصن و إزرعتك بروحي و بگيت اسنين أتنطر

سقيتك من حنان الروح گلت توفي لي من تكبر

بعد ما أدري يوليدي الحلم بالعكس يتفسر

إكبرت و إنعكست أحلامي.... و أنه اشراوتني أيامي

صريع إوليدي جذامي

التعب وينه و سهر ليلي .... ووين إرباك يالأكبر

تروح الروح يالغالي .... أبد متروح عن بالي

يماي الطاح شيلمك .... أعوفك لو أظل يمك

يالأكبر گوم حاجيني

يماي إتبده فوگ الگاع يا زهره امنثره إگبالي

زرعتك فرح يوليدي و جنيت إمصيبتك تالي

يغالي و أغله من عيني و يروحي الفاجده الغالي

عگب سهر الليالي إوياك .... يا لنك عالترب ألگاك

صريع إمغسل إمن إدماك

و عليّ تومي المحن و اتگول.... هذي الفگدت الوالي

جريت إدموع لمصابك .... حنيت إضلوع لغيابك

يمن صار الغسل دمك .... أعوفك لو أظل يمك

يالأكبر گوم حاجيني

إعصرت عيني و أحاجيها إشما عندج دمع نوحي

تجاوبني إبهضم جتال نشف من الهضم موحي

و روحي فزعت و ناديت اشمالك هودي يا روحي

حزينه و خيبوا ظني .... و نفذ حته الصبر مني

مثل ون الورگ وني

و إحنن حنت الناگه.... و أداوي إجروحي بجروحي

الگلب ناداك آه يبني.... هضم فرگاك شيبني

و لساني يلهج بإسمك .... أعوفك لو أظل يمك

يالأكبر گوم حاجيني

أسلي اهمومي بهمومي و بعد شترجه من دنياي

يا هرش السگيته إسنين ذبل و إنگطع من إحشاي

يا جمر اليسعر ابضلعي و يعگلي المنفگد و الراي

إجيت المصرعك أحبي .... أناشد و النظر تربي

طحت هذا انته لو گلبي

و نشدتك تظل عالغبره ....لو يبني ترد وياي

دليلي إينوح من همي .... وسافه إتروح من يمي

إهدمت حيلي يبعد أمك .... أعوفك لو أظل يمك

يالأكبر گوم حاجيني

أشوف الدنيه بعيوني مظلمه و ما كمل بدري

دمعتي إنحبست إبعيني شهگتي اختنگت ابصدري

گالوا راح عمر إبنج گلت لا هالگضه عمري

گالوا عالرمال إدماه .... گلت دمي إنسفك وياه

گالوا نحره شاهدناه

گلت لا هذا مو نحره ....هذا المنگطع نحري

أصيح إبصوت شيردك .... لفاني الموت من بعدك

يلنك بالگلب رسمك .... أعوفك لو أظل يمك

يالأكبر گوم حاجيني

ابهضم فرگاك مصيوبه عليه المحن من كل صوب

و أشوفك يبني عالغبره بدر و اعله الترب مصيوب

انحجب نورك ينور العين و أحوم اعله الصبر جم ذوب

حرت بهموم دنيايه .... إجيت و حزني ويايه

إعتنيت إبروح شجايه

أشكي لك هضم دنياي.... أصرخ و الدليلي إيلوب

بدمع عيناك ناديتك .... ترد وياي ياريتك

يمن همي مثل همك .... أعوفك لو أظل يمك

يالأكبر گوم حاجيني