للمعركه إتعنه و ترك بالصيوان گلب أمه يرجح بالهضم و الأحزان

إتوجهت للباري بدموع و أشجان هالوالده إدموع العين ما فارگت عيناها

تعلم إبحالي يا إلهي و تعرف ياربي إرحم دمع عيني اليذرف

رّجع لي الأكبر مثل رجعت يوسف بجاه الغريب المظلوم و بغربته و بلواها

خلصت دعاها الوالده المهمومه لن شافت الأكبر لفه امن الحومه

شمس الحرب غيّرت كل إرسومه و نار العطش و الالام حدر الضلع أخفاها

يصرخ يبويه و يا مسرت دنياي جيتك و نار العطش تسعر بحشاي

يا بويه من عندك ردت شربت ماي فتني العطش يا مظلوم و المهجتي لظاها

و حسين جاوب موقفك آذاني يبني يالأكبر هيّجت أحزاني

يوليدي خل إلسانك إعله إلساني و إلساني بلجن يرويك يا دنيتي و سلواها

جاوبه الأكبر يمن دهرك خانك يا بويه أيبس من لساني إلسانك

هاك الدمع و إخمد لهب نيرانك هاك إطفي نار الدلال من دمعتي و مجراها