حيرني الوكت يوليدي حيرني و باصرني يلكبر قوم باصرني

ليل انهار أصرخ يبني ليل انهار أصرخ يبني

حگ أعتب و أريد ارباي يالغالي يا المشدود بين ابتوت دلالي

يا شمعة زماني الضوت آمالي و ما جانت يلكبر أبداً ببالي

عله الحرمان تاليها تصبرني و باصرني يلكبر قوم باصرني

ليل انهار أصرخ يبني ليل انهار أصرخ يبني

تتمرجح جنت يالأكبر بقلبي و بين احشاي أحسك يالولد تحبي

بلهفه الجيتك أتنطر و أربي يمته اتصير و ايفتش جفن دربي

ياللي ارباك يبني اشكثر مرمرني و باصرني يلكبر قوم باصرني

ليل انهار أصرخ يبني ليل انهار أصرخ يبني

مهدك جان صدري و قلبي لوساده و اضلوعي صفن لگماطك أشداده

و گلبي بيك يبني حقق امراده و ما أدري تحصد قبل ميعاده

و بجفوف الزمن يوليدي تسطرني و باصرني يلكبر قوم باصرني

ليل انهار أصرخ يبني ليل انهار أصرخ يبني

من تعطش جنت أسگيك بدموعي و من تبرد ألفك يبني بضلوعي

و من تشهگ يا يمه ينخطف نوعي يا بهجة زماني العلگة اشموعي

و ضحاتك يلكبر جانت اتسرني و باصرني يلكبر قوم باصرني

ليل انهار أصرخ يبني ليل انهار أصرخ يبني

أسهر الليل بعيوني لمن تغفه و أخلي اضلوعي يبني اعليك ملتفه

عليك أختض يلكبر خضت السعفه يا وسفه تروح من ايدي يا وسفه

بكل ديره زماني بعدك يفرني و باصرني يلكبر قوم باصرني

ليل انهار أصرخ يبني ليل انهار أصرخ يبني

خذك مني زماني يا وسف يا حيف و صارت عشرتك وياك مثل الطيف

و خلصت و انگضت و آنه أصيحن حيف گبلك ريت يايمه ذبحني السيف

شفرات المواضي ريت وذرني و باصرني يلكبر قوم باصرني

ليل انهار أصرخ يبني ليل انهار أصرخ يبني