ودعتني صدعتني .. واندعيلك للخيم سالم تجيني

من رحت يبني للحرب .. وعزمت للحومة تطب

بيدي لزمت گلبي وخفت .. فوگ الثرى يطيح الگلب

ظليت اناطر جيتك .. وفرشت روحي على الدرب

حگك وماتدري شكثر .. فگد الابن عالام صعب

ياحياتي وذكرياتي .. يالخيالك مايبارح نظر عيني

وطبيت يبني لخيمتي .. للباري أشكي مصيبتي

ورفعت ايدي للسما .. وصرخت صرخة بدمعتي

ناديت يارب العرش .. بس انته تدري بحالتي

انا الحزينة الوالهة .. ياربي ارحم دمعتي

اشكي وضعي بهذا دمعي .. ياالهيي ارحم دموعي وحنيني

يامن تجلت قدرته .. عمت الوادم رحمته

ردلي علي من المعركة .. بجاه الحسين وغربته

ماعندي غيره بدنيتي .. تصعب علية فرگته

يارب مثل يوسف ترد .. ابني وتسرني بشوفته

جفني خاضع للمدامع .. ياالهي وادري ماتخيب يقيني

بهالحالة يبني ياعلي .. لفرگتك دمعاتي تهلي

وتقبّل الباري الدعا ,, ومن الحرب ردك الي

ياعلي وتدري بشوفتك .. هم العلية ينجلي

انته الضمد وانته السند .. وانته الذخر وانته الولي

اتبتني شيبتني .. شلون انسى سهري واتعابي وسنيني

سالم رجعت لخيمتك .. سريت گلبي بشوفتك

وحسين ابوك استقبلك .. ودموعه تجري لدمعتك

واسمعك تشكي من الظما .. ناداك رد لحومتك

جدك على الكوثر وگف .. وينتظر يبني جيتك

نادى ارجع وانه اسمع .. من سمعته ارتفه يالاكبر ونيني

للحرب شخصك من طلع .. اهجس ركن عزمي انصدع

وانتظر من عندك خبر .. كل خبر منك مارجع

بس الخيال على الجفن .. يالرسمك بعيني انطبع

حيف ووسف حبل الوصل .. مابينك وبني انگطع

تعز علية مو بيدية .. وسفة يبني بهالمصايب توفي ديني

وخليت روحي حايرة .. ومنك خبر متنطرة

وسمعت هضلة بالخيم .. وشنهو الحصل مايندرة

ناشدت گالولي علي .. دارت عليه الدايرة

ومن بعد لحظات سمعت .. وگالولي طاح على الثرى

ضيعتني لوعتني .. وحال يبني الموت مابينك وبيني