سور البنيته ... طايح لگيته

يا ما سهر جفني و تعب گلبي و فنيت الروح

تاليها يابني يا علي من بين ايديّ اتروح

بعيني شفت ذاك السهر من منحرك مسفوح

شيصبر الأم لو لكَت نحر الابن مذبوح

و غصني السگيته ... طايح لگيته

حسبت اشوفك بالشدد سور و عمد منصوب

تاليها شفتك منذبح و من الدمه مخضوب

عِجبة اعلى قلبي ليه صبر من عاينك مصيوب

كل هالنوايب و الغصص زين القلب ما يذوب

و زرعي الرُبيته ... طايح لگيته

يا بني علي لمن طحت جرح الگلب ناداك

تعبي التعبته و السهر طاح ووقع وياك

انسى حياتي و كل وجودي و لا تظن انساك

و تبدد اسنين العمر يا وليدي مثل ادماك

فرعي الجنيته ... طايح لگيته

يا ما سگيتك دمعتي و مسايل الأعبار

اترجه عودك يفترع و اتهنه بالأثمار

و يا ما حرستك يا علي و ردتك عمد للدار

لا ظل غصن لا ظل عمد بس الدمع و النار

و داري الحميته ... طايح لگيته

يا وليدي كل أم لو ابنها عنها غاب و راح

تنتظره يرجع و الگلب عنه الحزن ينزاح

بس آنا جسمك يا علي اقبالي تهاوه و طاح

من بعدك اگضي دنيتي بنوح و حزن و نياح

و ابني التنيته ... طايح لگيته

باصرني يصبي البصيره فگدتك عيناي

لو طالت أيام العمر جيف البصر و الراي

اشلون أگضي عمري يا نجم عمري الهوه من إسماي

أيامي عگبك موحشه و تمطر حزن دنياي

نجم الهويته ... طايح لگيته

ما من بشير الجيتك لا من خبر مأمول

أتمنه يخلص هالعمر خوفي اعله عمري ايطول

عجبه اعله ناري جيه تشب و ادموعي تجري اسيول

دوهني فگدك يا علي و ابدهشه روحي اتگول

عمري الفنيته ... طايح لگيته