يالتخدم أهل البيت .... أشرف طريق إمشيت

و أشرف بدايه .... درب الهدايه .... إلك

يالتخدم الأطهار .... هاك إستمع أخبار

يوم الحشر لو صار .... ما تمس جسمك نار

هالأمر مو مجهول .... كل الأخبار اتگول

صك الشفاعه إتنول .... من عترة المختار

ابحب إثنعش معصوم .... عندك درب مرسوم

خل إتصالك دوم .... بالعترة الأبرار

همَ الذي اينجوك .... من الخطر يحموك

و بدينك يوصوك .... لا تترك الآثار

سير ابدربهم سير .... عن معرفه و تفكير

ابحكمه و درايه .... درب الهدايه .... إلك

لا تبعد إبمسراك .... هاك النصايح هاك

سيد الرسل وصاك .... لا تخدعك دنياك

لا تمشي عالحبلين .... و بعينك إنظر زين

لمن تغض العين .... تتعثر بممشاك

إعمل ابطيب الذات .... و العمل بالنيات

لو حلت الشدات .... عين اللطف ترعاك

و إتخبرك الأعراف .... من تخدم الأشراف

يوم الحشر لتخاف .... إتنول النعيم إهناك

و يوم القيامه إتفوز .... و إعله الجنان إتحوز

يمحي الخطايه .... درب الهدايه .... إلك

إمن الخالق الرحمان .... كل حكمه بالقرآن

نرسمها بالأذهان .... نكتبها بالوجدان

من مجمل الإسلام .... شاهدنه بالأحكام

آل النبي الأكرام .... بيها العدل ينصان

همَ الحجج عالناس .... لهل العدل نبراس

بيهم رفعنه الراس .... و إتعمر الإيمان

هذا الأمر مذكور .... ربك جعلها إبدور

إبعرش الجلاله إتنور .... و إزدهرت الأكون

إعليهم روايه إتشير لو رايد التفسير

إتگول الروايه .... درب الهدايه .... إلك

يالتخدم الأسياد .... بارينه منك راد

تلتزم بالإرشاد .... و إتوفي بالميعاد

ابحكم السنن مكتوب .... حفظ الوعد مطلوب

تدري العمل محسوب .... بالوزن و الأعداد

غير العمل ميفيد .... نهج الأيمه ايريد

تلتزم بالتوحيد .... و اتحقق الأمجاد

منهجهم الإصلاح .... گلبي اويه گلبك صاح

إنشاركها بالأفراح .... نفرح إبكل ميلاد

ننصب محافل نور .... و إنطبق الدستور

كشف الخفايه .... درب الهدايه .... إلك

گلب المحب مشروح .... بمولد حبيب الروح

باب الخلد مفتوح .... عطر الموده إيفوح

هالليله فرحانين .... بخاتم المعصومين

من عالم التكوين .... مصدر شعاعه إيلوح

ابها الحفل المنصوب .... فرحة مهج و إگلوب

تستقبل المحجوب .... جفن النظر مشبوح

إگلوب و مهج هاليوم .... بالذكرى أيادي إتحوم

بيها الفرح مرسوم .... إلها الطرب مسموح

و ثاني فرح لو عاد .... مهدينه عالميعاد

بأعظم نهايه .... درب الهدايه .... إلك

نسأل من المعبود .... إعلينه بحنانه إيجود

إنريد الزمان إيعود .... بحق صاحب المولود

عاش الأمل وياي .... و الفرحه تكمل هاي

تظهر شمس دنياي .... من يظهر الموعود

نحسب اسنين اسنين .... للطلعه منتظرين

بيا ساعه و بيا حين .... الغايب يرد اردود

إنجدد فرح ذكراه .... للمهدي لو شفناه

بالفرحه نتلگاه .... ننثر عليه إورود

يا ساعه نوره إيلوح .... و يخمد لهيب الروح

بيه الكفايه .... درب الهدايه .... إلك