آنه و الليل و ضميري و ذكرياتي و بسمه من عمر الشباب اتغازل ادموع المشيب

و شوك يسبح بالخيال و حسره راس الصبر من عدها يشيب

و عاشرة سجت اظنوني ابخوف موسى و قمت أحس ابكل درب يتبعني ذيب

و كل محطات السفر تصرخ ابوجهي اذكر أهلك يا غريب

و لا تدور عن نصيبك انت بين الناس ما عندك نصيب

و دنيتك عسر رحمها و حتى لو جابت بعد غير الحزن و الضيم لا تصدق تجيب

و لا تدور للجروح البيك بلسم عادت اجروح المفارق ما تطيب

صحت بوي الله و لحد خلصت عشرين عام امن العمر عايش غريب

ووين أروح و حتى أشعر بالأمان و عدمن ألقه القلبي الملوع طبيب

و ما لقيت ابغربتي بس القصيده العاشرتني و عاشرتها عشرت المجنون لعيون الحبيب

صبري جم مره انكد بيه و تركني ابوليت الشمات بالظرف العصيب

و آنه طبعي ابكل مسيه اتغيب روحي اوي الشمس لمن تغيب

و ما لقيت بغربتي بس الحسين اليقطر ابدم الكرامه ابكل وكت شيبته الخطيب

آني علمني الحسين اشلون أعيش ابلا وطن حر و نجيب

وسع صدره و كرم نحره و جبدته و جسمه السليب

و عطش قلبه و دم رضيعه و دمعته الما فارقت خده التريب

و آني علمني الحسين بس غريب المعتقد هو الغريب