يا بو فاضل.... يا بو فاضل

إختك و أتاني جيتك .... يا بوفاضل

زينب تعنت للمهد مستبشره بواليها

اتناديه و بعين الوفه راعي الوفه يناديها

قطع اقماطه من إجت مد الجفوف اعليها

باليسره إلها ينتهض و بيمنته ايحييها

إنت كافل .... يا بوفاضل

فدوه أروح اليمنتك .... يا بوفاضل

خويه هله و ميت هله عباس إلك ملهوفه

قالوا كفيلج و أنتظر يمته العيون اتشوفه

مشتاقه أقبل هامته و عينه و أقبل اجفوفه

كل ليله بجفون الأمل غفله تمر اطيوفه

دوم أسايل .... يا بو فاضل

يا قمر طالت غيبتك .... يا بو فاضل

اشهورك التسعه اتمرمرت لمن قضت يالوالي

مثل اليصوم و ينتظر عيد الفطر يالغالي

كالوا عضيدج و أنتظر معقوده بيك آمالي

ابنومي يخويه و يقضتي صورتك دوم ابالي

دمعي هامل.... يا بوفاضل

دوم ابخيالي صورتك....يا بوفاضل

بالمهد صد إلها القمر صورة وفه ابها الصوره

اتقله تعال و ينتهض ناظر الخوه ايدوره

جنه يقلها اجفوفي لج يم الخدر منذوره

شبكته و نورين التقن نور العقيله و نوره

و هالمشاعل .... يا بو فاضل

ردت الروح ابشوفتك.... يا بوفاضل

شمته و صاحت فاطمه يا يمه لو موجوده

و من سمع إسم أم الحسن دار اعله اخته ازنوده

جنها يقلها رايتي و يطالب إخته ابجوده

و مشن احجاب اخته جرت دمع الوفه اعله اخدوده

اتقله ما ذل.... يا بو فاضل

احجابي أمانه ابرقبتك ....يا بوفاضل

عاف الرضاعه و مبتشر راعي الوفه وياها

فرحانه و انقض الوكت وي زينب و ملقاها

إخته تقله ابشاربك خويه يحامي إحماها

هيه التربي و تنتظر منك توفي إرباها