يروحي مثل ما ودج وديني

ابشوق الصوب أرض طيبه وديني

أظل شيعي و ابن شيعي وديني

دين المصطفه سيد البريه

فاز اللي ابرسول الله تمسك

عله هالحال للآخر تمسك

النار أبداً فلا و الله تمسك

طاعة الخالق ابطاعة نبيه

النفس خلها اتشوف اليوم راحات

و تدق راحه ابفرحها عله الراحات

أيام الظلم و الجور راحات

ابمبعث سيد أشراف البريه

الباري ابرحمته الأمه شملها

و عطور المبعث الليله شملها

اشوكت يا سيدي يلتم شملها

الأمه و ترد يم حامي الحميه

دليلي ابفرحة الأحباب واله

و راح اليوم نجم النحس واله

يربي صلي عل المختار و آله

انبعث هادينه و الدنيه زهيه

هوانه اللي نوده من نبينه

و سرنه اللي نضمه من نبينه

تعلمنه الشهامه من نبينه

نبينه المصطفه خير البريه

جفاني الجان بالدلال يارب

و عليه النظر ليل انهار يارب

صحت صبرني عالهجران يارب

ابجاه المصطفه و بنته الزجيه

الوكت لو جار من فرحنه

و عله درب الدواهي من فرحنه

لجن عطر الموده من فرحنه

يفوح و أمست الدنيه زهيه

قلبنه بالأمل يلهج وفانه

صحيح القال كل مبدع وفانه

نوفي و بان للعالم وفانه

وفانه امن النبي سيد البريه

أهني اليوم هالأمه وهادي

رسول الله انولد رحمه وهادي

نبينه سيد العالم وهادي

صلو اعليه يرباب الحميه

عيدنه بربيع و صار عدنه

و يوم اسباتعش من عاد عدنه

الفرح بثنين صار اليوم عدنه

الهادي و فرحة الصادق سويه

يمن أبديت للباري رساله

فلك نوح النبي بسرك رساله

إلك أبعث يبو الزهره رساله

على متن النسيم اليمر بيه

و حك من صام للباري وصله

أمل مكتوب للهادي وصله

محمد أشرف العالم وصله

و عليه الباري خلاق البريه