يعمه ليش ثوبج من رجعت أسود حزينه و دمعتج تتحاذر اعله الخد

الفضل صد عمته و مخنوق بالعبره ايقلها عمه يا بت فاطمه الزهره

أنشدج و القلب ممرود بالحسره و أريدن منج أسمع يالعقيله الرد

صاحت يا هله و دمع النظر يجري يا ريحة كفيلي و هيبتي و ذخري

هله يبن الفده عمره لجل عمري فقد عباس جرحه ابزينب اتجدد

ثوبج أسود و تهمل دمعها العين ولد عمي و عمامي فاركوكم وين

و العباس أبويه ووين عمي احسين صاحت كافي يبني جبدي اتمرد

يا عمه امروتك لا تنشد اعليهم أوجن و انطفي لو مرني طاريهم

اسهام أنصاب من أسمع بساميهم و جمرهم للحشر بضلوعي ما يبرد

يعمه أشلون عافج والدي ايقلها و علمنه الوديعه اببخت كافلها

و قال ايروح و يرد بيده محملها رديتي وحيده اوياج ماكو أحد

فقده يالفضل يوليدي شيبني الغيره امفصله وي والدك يبني

أنه و خدري أعز من روحه يحسبني عده ابخوته و حق الكفاله الحد

زينب شبكته و صاحت أويلي و آه عودك من هوه جوده و تلاه إلواه

و عينه و هامته و جف يسرته و يمناه انصابن و الفرات اعله الجره يشهد

لوله طيحت الوالي أبد ما جان يسلبونه و تشب امخيمي النيران

و لا راحت سبايه الحرم و الرضعان و لا خدري يعمه احترق و اتفرهد

يعمه قلها فصلي رايتي و جودي أبوي ازنوده طاحن ظلن ازنودي

أمانه ابرقبتي خدرج عقب عودي متورث حميتي امن الأبو و الجد

مو من الفرات و مايه تتروين أرويج ابدمع عيني ينور العين

لون سالم رجع للدار عمي احسين جا طاري الهواشم للمدينه رد