الدهر آه الدهر باليسر مشاني و عقب عباس ويه الشمر وداني

عيوني امساهر الليل و أحاجي الروح المثلي اشلون للكوفه يسيره اتروح

گالوا لي الصبر طبعه يداوي اجروح قلت بس آنه صبر القلب آذاني

ليالي البيض راحت ما أظنها اتعود و مضت عني و شفت بالطف ليالي سود

اشخلت بعد عندي ضربة العامود سلبت عزتي و هدمت بنياني

راحت عزتي و الخدر و الحشمه مثل الماي من يتبده شيلمه

أنه زينب و أم الخدر أتسمه تالي الدهر أم الحزن سماني

لمن صاب عين القمر سهم البين صوبني و سلب من عندي ضي العين

و الجفين آه يا قطعة الجفين هي السببت لوعتي و أحزاني

لو ما ينفقد يم النهر عباس ما جان اطلعت مسبيه بين أرجاس

اعليمن أعتب اعله الدنيه لو عالناس لو أعتب عالبلغرب خلاني

ما شافت اعيوني اجسوم عالتربان شفت ابدور تزهي و قلت هاي أبدان

ابلهفة قلب جيت المصرع الوليان كواكب شاهدت ظنيت ولياني

شفت اهلال طايح عالثره اموذر حين اقربت يمه لن علي الأكبر

جم ذوب أظل عالآهات أتصبر و جم ذوب أطل أحمل ضيم عدواني

اعيوني اعله الرمال اتشوف نجم اسهيل حين اقربت لن جسام دمه يسيل

اتجسوم الأهل زالت جن ظلام الليل و هالنور اعله درب اليسر دلاني