زينب يا دهر زينب تراني ..... ضيعني زماني

أهل الشيم عافوني ..... ابدار الغرب خلوني

و سهمك يا دهر بالطف رماني ..... ضيعني زماني

يا دهر زينب تراني و ما يهمني المصايب

ابعيني شفت ابدور أهلنه اموسدين اعله الترايب

و انته تدري يا زماني جم بدر من أهلي غايب

أول مصاب اللي جره ..... شاهدت الأكبر عالثره

و الروح ظلت حايره ..... من كثر جور النوايب

إقبالي يا دهر مصيوب الأكبر ..... و إقبالي توذر

و انته يا دهر تدري ..... بفراقه خلص عمري

امصاب الأكبر و فقده ولاني ..... ضيعني زماني

يا دهر ثاني مصيبه خلت الدلال هايم

إقبال عيني بالحرايب طفو شمعة عرس جاسم

شاب و ابمطلع شبابه انشوفه عالتربان نايم

اسيوف الحرايب زفته ..... و من دمه صارت حنته

و القوم طفوا شمعته ..... و فجعوا اكَلوب الفواطم

تدري يا دهر من عقب جسام ..... خانت بينه الأيام

و لمن طفوا اشموعه ..... ظلت رمله مفجوعه

و ابفقده انهدم بالطف كياني ..... ضيعني زماني

يا دهر ثالث مصيبه افقدنه حماي الضعينه

و ريت سهم الصاب عينه ايصيب عيني قبل عينه

و بالعمود انهشم راسه و قطعوا يساره و يمينه

لو ما فقد راعي العلم ..... ما تنسلب هاي الحرم

و لا تلتهب نار الخيم ..... وليه من عقبه انولينه

صابوا عينه و انقطعت الجفين ..... وين أنطي الوجه وين

طاح اعله النهر جسمه ..... و راحت رايته يمه

ما أنسه جفيلي و لا نساني ..... ضيعني زماني

يا دهر رابع مصيبه خلت ابدلالي جمره

و غيبت روحي و مهجتي و حاير الدلال بأمره

يا دهر شايف رضيع و بالسهم ينقطع نحره

يا ذنب عنده هالطفل ..... بالسهم نحره ينفصل

يا ريت قبله أنجتل ..... و غاب عمري قبل عمره

نبلة حرمله صابت الدلال ..... و دمعي امن الجفن سال

و أمه اتصيح يا الغالي ..... يا وسفه المهد خالي

هاي الصرخه من قلبي و لساني ..... ضيعني زماني

يا دهر و الخله هاي الدنيه بعيوني مظلمه

انهدم حيلي و ذاب قلبي من رجع مهر ابو اليمه

ايدور بحدود المخيم جن ندهني و رحت يمه

ناديته و ايهل الدمع ..... ابرجعته قلبي منفجع

جاوبن دخرج منصرع ..... عالترب و يسيل دمه

رحت اويه المهر و ادموعي بالعين ..... رحنه المصرع حسين

شفت حسين عل الغبره ..... دامي و منسحق صدره

صحت ابصوت يا ريتك تراني ..... ضيعني زماني

ارجعت من يم أبو اليمه و الدموع اتفيض من دم

لا أهل لا إخو عندي و لا جفيل و لا مخيم

و داير العسكر علينه و هذا ليل الحزن خيم

لا خيم لا و والي إلي ..... لمن قطعوا بالطف هلي

اتوجهت للوالد علي ..... صحت صيحه ابحزن و بهم

وينك يا علي يا داحي الباب ..... صرنه ابين الأجناب

منهُ اليحرس العيله ..... هالليله و أشد ليله

امصاب الأهل يا حيدر دهاني ..... ضيعني زماني

هذا ليل الحزن يمضي و المهج بالنار تسعر

و من يطر مصباح باجر لليسر تطلع الخدر

ترضه يا با الحسن ترضه اعله الهزل تطلع يحيدر

و اليسر يا بويه اليسر ..... أصعب و أشد من كل أمر

دلالي ما يحمل صبر ..... و عالهضم ما أظن يقدر

ترضه يا علي للكوفه و الشام ..... تطلع هاي الأيتام

ريتك تنظر الحالي ..... محتاره و بلا والي

أصبر و أدري صبري ما كفاني ..... ضيعني زماني