هجمت العسكر ... و خيمتنه تسعر ... بويه يا حيدر

وينك يا من وصيت اخوتي ابعزتي ... كلها انتهت لا عزتي و لا إخوتي

هود الليل و يمي وقفت عيلتي ... و هذا سواد الليل ينقل صرختي

صرخه و يترجمها مصابي و دمعتي ... ريتك عدل و اتشوف حالتي

ما أظن تقدر ... اتشاهد المنظر ... بويه يا حيدر

يا بويه مر انهار بينه ابكربله ... ريتك عدل و اتشوفه يا عقد الوله

ويه زلمنه انقطعت إحبال الصله ... و ظلت يحامي الجار بس العايله

كل سا طفل ركضت الخيل اتجفله ... يجفل و أروح ابلهفه و أتوجه إله

و أنظر الخدر ... تاهت ابها البر ... بويه يا حيدر

خيل و رجال و ضمه و نيران و ألم ... و إقبالي يا حيدر اجسوم أهل الشيم

كل أهلي صرعه و منها ما واحد سلم ... أنظر الخيل اتدوس أطفال و حرم

أنظر النار التهبت ابكل الخيم ... أنظر خدرنه و يه الخيام انضرم

خدري توجر ... و حالي تغير ... بويه يا حيدر

هالصدمه ما جانت تمر اعله الفكر ... من بعد عباس الأمر بيد الشمر

لا ذيج عزتنه و زلمنه و الخدر ... و لا هاي ذلتنه و خيمنه التستعر

محتاره أحرس أم لإبنها تنتظر ... لو ألزم الطفله التهيم و تنذعر

يا موقف أكثر ... عالقلب أثر ... بويه يا حيدر

عن حالة الأطفال أشرح لك بعد ... هجمت اخيول اعليها ما إلها عدد

و طفل اليشوف اللهب بثيابه صعد ... يركض و نار الخيم تلذع بالجسد

و الما تلوحه النار بالخيل انمرد ... وشجم طفل هاليوم من عدنه انفقد

فكري تحير ... دمعي تفجر ... بويه يا حيدر

عفت الخيم و النار بيها مسعره ... اتوجهت للمعركه ابروحي الصابره

شفت لجسوم اعله الأرض متوذره ... شفت أبو اليمه السيف قاطع منحره

و جسام شفته اعله الترب دمه جره ... و يمه علي الأكبر صريع اعله الثره

و من شفت الأكبر ... قلبي تفطر ... بويه يا حيدر

ظليت أقومن و أعثر ابهالفاجعه ... و عفت الجثث فوق الأرض متصرعه

اتوجهت بمصيبتي الصوب المشرعه ... شاهدت جفين الكفلني امقطعه

و شفت العلم يم جثته المتوزعه ... لو بيدي يم عباس أظل ابمصرعه

شبلك توذر ... و جسمه اتعفر ... بويه يا حيدر