أخاف امن أعوفك .... بعد ما أشوفك.... إذا ما تجيني أقدر ظروفك

طويله رحلتي .... و أخاف ابرجعتي.... بعد ما أشوفك

يعباس إختك آنه ولا تبارحني .... جنت انت التمسيني و تصبحني

فرقتك ذلتي و شوفك يفرحني .... كلام الشامت ابفرقاك يجرحني

ياريت الموت أخذ روحي و يريحني .... و إذا أنساك الله لا يسامحني

أخاف أشتكي لك .... و أعذب دليلك.... و أريد بدموعي أبرد غليلك

تودعك دمعتي .... و أخاف ابرجعتي.... بعد ما أشوفك

أودعك يبن أبوي و لليسر أطلع .... و أعوفك بدر غايب نوره بالمصرع

مثل جسمك توذر قلبي و اتقطع .... كلام اوياك صار ايترجمه المدمع

إذا أرجع يخويه اشراح أتوقع .... إذا أرجع أشوفك بعد من أرجع

أباصر دليلي .... سفرتي و رحيلي.... قلت له عجيبه أفارق كفيلي

اعله فقدك حسرتي.... و أخاف ابرجعتي.... بعد ما أشوفك

أصيحن و اليموت اشينفعه الصايح .... اسكتت و ادموعي جدول عالوجن سايح

غصب عني أعوفك و الظعن رايح .... بلا توديع أتركك عالنهر طايح

تعاتب لا تعاتب و العتب جارح .... تودني و اليود من شيمته ايسامح

ظعنه ابراوحه .... يريد السماحه....تسير الظعينه ابونين و نياحه

تنشدك مهجتي.... و أخاف ابرجعتي.... بعد ما أشوفك

أنشدك لو مشيت ابظعني و أتيسر .... تقدر تنهض اتشد الظعن تقدر

إذا بسياطه خصمك يضرب الخدر .... تقدر تحمي عيله و سايره ابها البر

إذا جتالك ابمجلس شتم حيدر .... تقدر تجي اهناك اتدافع و تحضر

إذا وقفونه .... ابمجالس عدونه....حرم و احنه نسمع يشتمون أبونه

اشينشف عبرتي.... و أخاف ابرجعتي.... بعد ما أشوفك

إذا مسبيه من يمك رحت و امشيت .... و عني ما قمت يا با الفضل حاميت

و إذا مجلس دخلت و حايره ظليت .... إذا حشمتك و للنخوه ما لبيت

العذر مقبول منك خويه لو ما جيت .... اشلون اتقوم و انت بس جسد ظليت

يجمرة حنيني .... يعذرك ونيني....عسن مني قطعوا يساري و يميني

اشيرجع لهفتي.... و أخاف ابرجعتي.... بعد ما أشوفك

اشخلت ساحة الطف خذت مني احيود .... شحجي اوي النهر و السهم و العامود

فطر جبدي العطش من نار سهم الجود .... إذا تسكن لحد أسكن يخويه الحود

للطف يبن أبويه الظعن من ايعود .... أخافن ما أشوفك لو رجعت اردود

يطول غيابي .... و أجيك ابمصابي.... إذا ما لقيتك تزيد عذابي

تهيّج جمرتي.... و أخاف ابرجعتي.... بعد ما أشوفك