يازاير زينب اگصدها … تحصل رادتك عدها

بيقينك زور … ترد مسرور … تحصل رادتك عدها

يازاير امن تيقن شلك من حاجة مقضية

اذا تعرف كدر زينب اذا تدعي بصدق نية

رضية وزاكية وحرة تعنت ربهة مرضية

كرامة الخالق انطهة شفاعة وهيبة قدسية

وسيلة لرحمتة وعطفة ... بكرمهة بفضلة وبلطفة

سند مذكور ... ترد مسرور ... تحصل رادتك عدها

يازاير اطلب شرايد يهون شما إلك مطلب

مشيأت خالق القدرة وجاهة بت علي زينب

شتريد الباري ينطيهة وعليهة ياطلب يصعب

الدعاء بكبت اخت حسين قبولة مأكد مجرب

عطر حضرتهة ليشمة يطيب وينجلي همة

تشم عطور ... ترد مسرور ... تحصل رادتك عدها

يازاير لو ردت مني دليل اليقنع وبرهان

اذكر موقف لزينب بيه يتجسد الايمان

روفعت جسم اخوهة حسين بيديهة وناجت الرحمن

ياربي لون يرضيك تقبل منة هل القربان

تناجي وبدمع جاري ... هدف زينب رضة الباري

تقدم نذور ... ترد مسرور ... تحص رادتك عدها

يازاير تشهد لزينب خصال المحد يعدها

امهة فاطمة الزهرا وطه المصطفى جدها

وحيدر حاضر الشدات حامي دخيلة والدها

وكاصد للحسن وحسين المن البعد يكصدها

تسر بجيتك اوخوتهة ... يهل كاصد زيارتها

صحنها تدور ... ترد مسرور ... تحصل رادتك عدها

يازاير يالموالي زحوف لمرقد زينب اتعنة

والزم بيدك الشباج وابجي واجذب الونة

مصايب زينب اذكرهة واطلب منهة واتمنة

شفاعة اخرة ودنية ضمانة مغفرة وجنة

واذا تذكر فضل عمهة ... يهل زاير ترد منهة

بذنب مغفور ... ترد مسرور ... تحصل رادتك عدها

يازاير بالزجية انخاك وذمة بركبتك ذمة

من توصل كبر زينب اخت حسين ابو اليمة

اريدك عدهة تدعيلي دليلي ينجلي همة

واريدانك عوض عني كبرهة تقبلة وتشمة

مرامك لابد تنولة ... بأجر وزيارة مقبولة

عهد مذكور ... ترد مسرور ... تحصل رادتك عدها