أحاجي نحرك المذبوح و أعيد الماضي و اتصوّر

الطفولة ذكريات وياك صرت يا حسين اتذكر

آنة و الحسن و انته و أمنا فاطمة و حيدر

البراءة تظلل علينا و يبارينا حلم أخضر

لن طبع الدهر غدّار فاجئنا بنزول الشر

الدهر يا حسين راوانا ضلع من فاطمة اتكسّر

بجيت آنة و اجيت انته بقلب ملهوف يتحسر

مسحت دموعي بجفوفك قلت واجبنا نتصبر

صبرنا و من بعد فترة انطبر راس الوصي حيدر

صرت من بعد حامي الجار أنوح و ناري تتوجر

و اجيت انته تصبرني و تواسي مهجتي التسعر

يا خوية و هم صبرنا ردود و صار النا الصبر مظهر

و ردود الدهر يا حسين رمانا بسهمه و اتجسّر

راوانا الحسن مسموم و شفنا الجبد يتنثر

و اجيت و قلت لي يا زينب عليج الحزن لا يظهر

بقينا نعيش آنة وياك مثل النبع و العنبر

من اشوفك أنسى كل همي و أهيم و مهجتي و تسكر

كبرنا و الصبر يا حسين ويانا غدى يكبر

ما فارقتك و عفتك و لا لحظة يبو الأكبر

كل عمري قضيته وياك يا خوية و حان المقدّر

لن شفت جسد دامي صريع و بالثرى معفر

منهو اللي يصبرني و اشوفن جسمك موذر

و على صدرك يبو السجاد تجول خيول هالعكسر

جنت انته تصبرني غبت و شلون راح اقدر

ما أقدر بعد يا حسين أتحمل صبر أكثر

يا ريت الموت ياخذني و عسى هذا العمر يقصر

عقب ذاك الحنان صرت محتارة بالخِدَّر

عقب ذاك الدلال الراح ويا عداكم اتيسر