بت حيدر بعبره... تستقبل الزهره...و شتنفع الحسره

بعيون مجروحة بدمع ألّمها...شاهدت صورة كدر ما أعظمها

مابين زينب و الوديعة أمها...كل وحدة منهن سارحة بعالمها

و بكل قلب جمره ...من همها مستعره ...و شتنفع الحسره

زينب تصد و الدمعة دم تهلها...لن شافت أمها الزهرة قصدت الها

وقفة حزن وقفت و تستقبلها...خل نستمع زينب شراح تقلها

يا جدة العتره ...قلبي خلص صبره ...و شتنفع الحسره

صاحت الزهرة شعمل وياج البين...وين اخوتج يا زينب و وين حسين

لن زينب تجاوبها بدموع العين...يايمة لو ناشدتيني عن ابنج وين

ظامي انقطع نحره ...و اتوسد الغبره ...و اشتنفع الحسره

ابنج حسين قبالي يايمة انصاب...طايح صريع على الثرى و بالدم غاب

و مصابه ماصار و حصل مثله مصاب...يمة و مثل ضلع التكسر بالباب

ضلوع ابنج مكسره... الخيل اسحقت صدره... و اشتنفع الحسره

صوب الجسد راحن الزهرة و زينب...شافن حسين بدم وريده مخضّب

علجسد طاحت بنت محمد تنحب...و تقله جسمك ليش يابني مسلب

دلالي لو صخره... هالنايبة تكسره ...و شتنفع الحسره

زينب تخاطب فاطمة بالآلام...ظلي بكتر جسم ابن أبوي الضرغام

و آنة اروحن للحرم و الأيتام...تدريها عيلة و مابقت عندها خيام

خيمتها متوجره ...و الجيتي منتظره... واشتنفع الحسره