الوادم لو لفاها الليل تعد الليل للونسة

وانا شچم ليل چم مصباح يجي ويروح من نفسه

اه ياليل .. ماتم حيل ...... ابوية وغربت شمسه

انا بچم ليل ناغيته ونيمته بجرح گلبي

واراقب نجمة التهوي وعيني على الجسر تربي

ويتمسى بسواد الليل وماوچد بعد دربي

اه ياليل .. ماتم حيل

الوادم لو لفاها الليل تتهيأ لذاك الليل

للمسامر تطيب نفوس وجروح الحياة تزيل

وانا من يوافيني اصرخ والدموع تسيل

اه ياليل .. ماتم حيل

عگب ذيچ الليالي البيض المحفوفة بسعادتنا

شفت ليل الخرابة ونار من جمرة مصيبتنا

وهنده الخادمة عدنا صفت هاليوم اميرتنا

اه ياليل .. ماتم حيل

نهاري مو نهار الناس وليلي بيه مبلية

نهاري شلون بيه ارتاح واتهنى بلياليه

واشاهد عمتي زينب بيتامى حسين مسبية

اه ياليل .. ماتم حيل

انا ببيت السعادة ربيت وترعرعت باحضانه

وابوية حسين دللني وجساني بغمرة احسانه

صدك طفلته گبال يزيد صدگ توگف بديوانه

اه ياليل .. ماتم حيل

يليل الهضم تتذكر منازلنا وسواليها

چانت مگصد الوفاد تشد الراحلة ليها

مشينا بلا حمى ولادار عگب داري ولياليها

اه ياليل .. ماتم حيل

يليل النايبة وياك يليل المانطتني سهام

يليل شما تطول تطول رويحي وترهى عالايام

عهد زينب نطت لحسين تكمل نهضته باحكام

اه ياليل .. ماتم حيل