حيدر نشر دعوة محمد و الرساله...ابحكم العداله

و اتنور الكون ابعلم حيدر و أنواره

حين قام النبي الهادي ابدعوة الدين و نشرها

حيدر أول شخص قام و لبه هالدعوه و أمرها

و رفع راية نصر إلها و جاهد ابعزمه و نصرها

و ظل أبو الحملات الفته ... إخلاف الرسول و بعثته

مسؤول هو ابدعوته ... و يصلح الأمه ابسيرها

هم اسمعت واحد مثل حيدر الكرار ... للحكم من صار

يعمل المصلحت الرعيه ابليل و انهاره

اتعمق ابفكرك الواعي و انظر الأعمال حيدر

حته تعرف هالإمام العادل المرجع الأكبر

اشلون أصبح بالعوالم للحكم و العلم مصدر

بالكون مجموع الأمم ... علمها أسرار و حكم

و أصبح مثل نار ابعلم ... علمه و اعله الكون يزهر

هاي العلوم من انين إجت و الإكتشافات ... و الإختراعات

كل هذي من نهج البلاغه و علمه و أسراره

هذا علمه لو بعد إنظر عدله ما بين البريه

ايقول حيدر لو أنام اعله الحسك فوق الوطيه

و آنه بغلال الحديد امقيد امصفدين ايديه

أهون عليه هالأمر ... و لا أوقف ابيوم الحشر

و آنه ابحياتي و العمر ... ظالم أحد بالرعيه

هذا الإمام اليستحق تاج الإمامه ... و عرش الزعامه

موش التمص دم الرعيه اتصير أمّاره

و لمن الكرار صار الحكم بيده وبزمامه

و اعتنه الدار الخلافه الكوفه عاصمة الزعامه

و طلع شعب الكوفه ميتين ألف يستقبل إمامه

جان ابن عباس ابكتر ... حيدر و يمشي اعله المهر

ناداه يفارس بدر ... عاين الهاي الكرامه

شوف الجماهير الإجت تستقبلك شوف ... وقفت لك اصفوف

و ابها الحجي لبى له ياخذ من علي ابشاره

من سمع صد ليه حيدر لجن بيده النعل شاله

قله تعرف ثمن هذا قله أبداً ثمن ماله

قله أمرتكم و كرسي الحكم هاليوم و مثاله

عندي مثل هذا النعل ... حته آخذ الحق بالعمل

امن أهل المظالم و الجهل ... و أحكمه ابحكم العداله

آني ما تخدعني الزعامه يبن عباس ... و لا كثرة الناس

و لا أطمع ابحق الشعب و أتحمل أوزاره

و جان حيدر يوم يمشي ابين أسواق المكاسب

ايريد يتفقد أحوال الناس و يحل المطالب

التفت شاف الناس خلفه تمشي جمهور و تراقب

من عاين الوادم مشت ... خلفه و عليه اتجمعت

ما رضه و للناس التفت ... و صاح لاجن صاح غاضب

يناس مذموم المشي اخلاف الرجالات ... و هذي دعايات

اتفسد أخلاق المجتمع و اتحطم أفكاره

هذا حيدر هذا وضعه بالتواضع هذا فعله

و هاي أخلاقه و كماله و هذي بين الناس عدله

اشتعتقد هم هذا يحصل قائد ابها الكون مثله

لا شخصه بالأمره انخدع ... لا عينه شبحت عالطمع

اشلون المثل هذا انخلع ... امن الحكم و انجحد فضله

حامي الحمه اللي شيد الإسلام بالكون ... يتبع علي اشلون

و اتقوم تحكم عالرعيه ناس غداره