هذا انت خويه و هاي فضوة خيمنه و الشاطي ما هو ابعيد هاوينه يمنه

لزمت يمين السيف قبضت يمينك بالخيمه كلها اتصيح والينه وينك

يقطع لجام الموت صارم يقينك و اعله الخيم بالزود يخفق علمنه

فتنه العطش و الماي من عدنه مفقود جود السقايه اوياك يا صاحب الجود

يا خويه من كل صوب هالشاطي مرصود مستعره بالأرواح جمرة ألمنه

يا با الفضل هيهات يبرد غليلي هذا العطش بركان وجر دليلي

فطر صميم إحشاي لا يا كفيلي ليث الوغه و حاشاك ترضه ابهضمنه

عباس أريد أنخاك و اسمع نخوتي انت الكفلت احماي من دون اخوتي

متحيره و ظليت أترجه موتي ابديرة غرب و الموت يلهج بإسمنه

نار العطش و اتلوب بالخيمه لطفال أشرح إلك يا حال حال أدهه من حال

يا خويه و احتاريت يا جلمه تنقال عطشانه امن الماي خصمك حرمنه

منك نريد الماي يا خويه منك كل لحظه طفله اهناك تنشدني عنك

عندك بنات اخدور بالهم لفنك غيرك يا سيف الموت ما يجلي همنه

بمخيمك رضعان شاجر قلبها و امخدرات اوياك تسمع عتبها

من عيني دمعه و نار لجلك أصبها لو فارقتنه انشوف غارة خصمنه