اعله كيد اهمومي و الاحزان ..اعله جمر الهضم و الاشجان

اجيتك جيت الثقله الحزينه و مالها وليان

اجيتك جيت العافت أهلها اموسده التربان

اجيتك حايره و أصرخ دخيلك يا كمر عدنان

عفتنه بديرة الغربه حرم و بولية العدوان

لا ظل والي يحمينه و لا والي و لا عوان

و هاي احنه حرم و ايتام و عليل ايعالج و رضعان

وين انروح ما ندري و أهلنه اجسوم بالميدان

نشوف الخيل يا عباس غذت تسحق عله الأبدان

عقب سحق الجثث هالنوب علينه دارت الفرسان

علينه اتوجهت هالخيل و علينه حرقوا الصيوان

صرت كل ساع أجر طفله و طفل من ذوية النيران

و طفل الما تلوحه النار تسحقه اخيول ابن سفيان

العيله امن الرعب هجت و اتطشرت بالوديان

يخويه و آنه بين الخيل أكابر و الفكر حيران

حرت بين أجمع أيتامي و بين أجمع النسوان

عساني ما طلبت الماي يخويه و ريت موتي حان

و عساني ما كلت خويه الطفل يا بالفضل عطشان