حست العيلة بفكد واليها و حين هجمت قوم أمية اعليها

بالعمد راس القمر من انهشم و الجفوف انقطكعت و طاح العلم

بالمصيبة حست اقلوب الحرم و الخيم تهاهت عقب راعيها

اشيظل بالمكفول من عقب الكفيل ظلت اعيون الحرم من دم تسيل

و بعد ظلت تنتظر وحشة الليل تايهة و ماواحد ايدليها

للنهر طلعت العيلة امصدعه اتريد للعباس تنظر مصرعه

اتشاهد اجفوفه صدق متقطعه و جثته بدم رقبته امغسليها

و بعد رادت تنظر الحال القمر و صدق عينه امصوبه بسهم الكدر

اتصيح يعباس ليش اعله النهر و جثتك فوق الثره امخليها

للنهر وصلن لقن بس الجفوف وحده راحت للجسم تصرخ بخوف

وحده يم الجود محنيه و تشوف بيه ماي من العطش يرويها

يم جسم عباس مفجوعه العيال فاجدات الأمل و العز و الدلال

و ابتدت أم الحزن تعرض الحال اشما تحاجي القمر ما يحاجيها

اتصيح يعباس عفت الحرم ليش انجرح قلبي و بيش أداوي الجرح بيش

مادريت اعله الخيم هجمت الجيش و العده ليتامك امسلبيها