بعيونك إحروف ترويهن إعبار

بعيونك  إحروف…  ترويهن  إعبار
و  بدمعك إنشوف… كل الجره و صار
دمعتك  قصة حزن…تنكتب فوق  الوجن
تنكتب فوق الوجن…يا زين  العباد

يا  علي السجاد دمعاتك  روايه
من تهل تروي المصايب و  الرزايه
عن مصيبة أهلك الراحوا  ضحايه
يم الفراة و قضوا كلهم ضمايه
ريت عالموت أوقفت هاي الجنايه
و  لا  مشن للشام عماتك  سبايه
ريت  و عله الموت… توقف  هالالام
و لا زينب إتروح …للكوفه و  الشام
عبرتك  من  الجفن …تنكتب فوق  الوجن
تنكتب فوق الوجن…يا زين  العباد

يا علي السجاد دمعك لمن  إيسيل
نفتهم  أحزانك إبكل التفاصيل
إبعينك  إتشوف الحسين إبلايه  تغسيل
بالشمس  مرمي و عليه تترادف  الخيل
لو  نظرنه بإيدك آثار  الزناجيل
نفتهم  مأساتك إبظهر  المهازيل
بمتونك آثار …أسياط الأنذال
و بجيدك إجروح… من طوق  الحبال
إمصيبة إجروح المتن…تنكتب فوق الوجن
تنكتب فوق الوجن…يا زين  العباد

ذكريات  العاشر إتعيش إويه  ذاتك
إشما تسد إعيونك إترد ذكرياتك
من  كثر نوح الذي ما يوم  فاتك
الحزن و الدمعه صارن من صفاتك
سيدي  و إشلون تتهنه  بحياتك
و  إنت شفت امن الخيم ركضة  خواتك
من صارت النار… تسعر  بالخيام
فرن هاليتام …حفاي  الإجدام
كل  يتيمه من تون …تنكتب فوق  الوجن
تنكتب فوق الوجن…يا زين  العباد

و  أنشدك يا سيدي بالدمعه و  الآه
حين نزلت الحسين إبدار مثواه
إشلون  شلته  بباريه و متوزع  أعضاه
من دفنته هم دفنت الخنصر  إوياه
يا علي و أقسم عليك إبحرمة  الله
هم سمعت الزهره أمه إشلون  تنعاه
من  هلت التراب… بيديك  الأثنين
هم  جانت إوياك… تبجي أم  الحسين
فاجعة يوم الدفن…تنكتب فوق  الوجن
تنكتب فوق الوجن…يا زين  العباد

عشت  عمرك كله بالهم و  الأذيه
كل  كتر صاير تشوف  الغاضريه
سيدي و من اللي شفته  إبهالرزيه
متت  جم مره قبل يوم المنيه
و مره لمن شاهدت زينب سبيه
و مره حين اللي إدفنت إختك رقيه
بسهام  الأيام  …دلالك  إنصاب
مكتوبة  الهموم …بحروف  المصاب
جلمة إوداع اليحن…تنكتب فوق  الوجن
تنكتب فوق الوجن…يا زين  العباد