هذا يا قلم

هذا  يا قلم …يوصف الألم
إبدمعة المهدي …و دمعنه نرفع  العلم

السماء الجان صافي إختلفت  ألوانه
غيّم  و جن غيمه حمره تبجي  ويانه
و  إزدحم موج المدامع و إحنه سفانه
أذن  آذان  الوداع إبوحشة  أحزانه
موسم  الجراح…و الدمع  مباح
هذا أبو المهدي نودعه… و ثاره  بالذمم
إبدمعة المهدي …و دمعنه نرفع  العلم

عادت المحبوب يبجي إيريد محبوبه
ما تبات الدمعه ندري إبعيون مصيوبه
ونت المهدي يتيمه روحه  مسلوبه
والده ممرود جبده و ينظر  إغروبه
مدمعه  يسيل…ساعة  الرحيل
العرب  سيدها هذا… و سيد العجم
إبدمعة المهدي …و دمعنه نرفع  العلم

من يشيع هالجنازة إبروح  مفجوعه
ونت  الشيعي  إنعرفها و نعرف  إدموعه
صحنه  ويلاه يا إمامي إبحسره و  بلوعه
و الجنازة إعله الأصابع كون مرفوعه
نكتب  العهد…ما نذل  أبد
و  الإمام الحجه يمنه… و نقسم  القسم
إبدمعة المهدي …و دمعنه نرفع  العلم

الظلم  لو  دام دمّر و الحصل يا  مه
جم  يتيم إنصاب قلبه إبسمه و  إسهامه
هذا إبن الهادي بالسم يختم  أيامه
و الإمام المهدي يمه و أشعر  آلامه
ودع الحنين…إبحسره و بأنين
إنهدم  قلبي يمهدي… و قلبك  إنهدم
إبدمعة المهدي …و دمعنه نرفع  العلم

أمة  الباعت  ضماير ما  نعاتبها
المستحب  عندها وجوب و تنسه  واجبها
ذلة و صوت الكرامه ما  يناسبها
غير أبو صالح المهدي ما  يحاسبها
ساعة الحساب…تنحني  الرقاب
ما ترد الراح حسره… و دمعة  الندم
إبدمعة المهدي …و دمعنه نرفع  العلم

أشعر بمأسات إمامي و أعرف  إهمومه
لو  زرت  سامره أنظر قبه مهدومه
أشتم إترابه و أنادي روحي  مهضومه
و أشعر الزهره الزجيه اليوم  مسمومه
فاطمة  تنوح…تنزف  الجروح
تنحب الزهره إعله إبنها… و الظالم إبتسم
إبدمعة المهدي …و دمعنه نرفع  العلم

شيعة  الكرار حضرت نعشك  إتشيعه
صيحت المهدي يبويه إجروحنه  إتسمعه
حجة  الله  إبهذا عمره ووالده إيودعه
ناحت  السبعه  المصابه و الوحي  ينعه
سيد  السلام… أصبح  الإمام
هو  بالموكب تقدم …صاحب الشيم
إبدمعة المهدي …و دمعنه نرفع  العلم

نعشك  أحبابك تشيعه إبروح  محزونه
بس  أبو  الأكبر غريب و ما يشيعونه
ظل  ثلثتيام  عاري و ما  يدفنونه
عالرمح  راسه و لزينب شابح  إعيونه
نظرة الغريب …تجرح  الحبيب
عالهزل  يحسين  أخبرك… راحت الحرم
إبدمعة المهدي …و دمعنه نرفع  العلم