يالنايم اعله العلگمي

يالنايم  اعله العلگمي من نومتك  گوم
يهنا  لك  النوم
ما  تگعد تسوي لعليلك والحرم  جاره

هالله  هالله شلون وگفه وگفت الحرة  العقيله
گابلت شاطي الفرات وصاحت بونه ثجيله
يعباس  الضعن  هذا رد يودعك يا جفيله
ويخبرك شصار وسدر….. من طحت مرمي على النهر
وانصاب الحسين بحجر…. والسهم مرد دليله
فرهود صاحوا بالخيم من عگبك  الگوم
يهنا  لك  النوم
وظليت آنه بهاي الحرم حايره ومحتاره

ريت سيف الگص يمينك گص يابو فاضل  يميني
والعمود الفضخ راسك حال مابينك  وبيني
ونشف  من  الدمع جفني من سنا جمرة  حنيني
إي  وحگ جفك والعلم…… ع?بك عليّ بيتي إنهدم
الله من صوت السهم …. مثل عينك فگس  عيني
يالصوبوا عينك سهم والسهم  مسموم
يهنا  لك  النوم
من  عينك يفور الدمه ومن عيني  يتجاره

يعباس  شلون وليه بولية عداك  انولينه
حرم والخيل ادهشتنه وحرگوا خيمنه علينه
نار  فوگ النار شبت بالضماير  وانسبينه
نار  المخيم والضمه… صاحت ودايع فاطمة
لاظل  خدر  لاظل حمه….. گوم ياحامي الضعينه
نارين  الصارت  بالگلب تتواگد  اليوم
يهنا  لك  النوم
جمر الضمه وحرگ المخيم گملت ناره

يالعليك الخوه فرضت تسبح بدم  الحميه
فرضت علي الكفاله ومضت بيها  الغاضريه
أنا  واكفلت عگبك خواتك واشگفت عنهن  بديه
لاگن  الحاله تغيرت….. وبيوت أهلنه  تهدمت
عگبك  والعيال  إنسبت….. وآنه أديت  العليه
بين  الأخو وبين الإخت لازم  وملزوم
يهنا  لك  النوم
وهرش الگلب من ينمرد تتغير  اثماره

يعباس شلون حيره تحيرت وانگطع  گلبي
وظل يحوم على الشريعه وعيني على الخيم  تربي
طحت  يصبي البصيره وبيش اوجد بعد  دربي
نصين دلالي إنجسم…. مابينك وبين الخيم
ياخذ لك أخبار الحرم…. يالطحت بسهام  عتبي
عباس ظل بمصرعك گلب إختك يحوم
يهنا  لك  النوم
ويسدر الخدر الحرم ياخذ لك أخباره