ليلة عيد وأفراح وعطر الشوق الفواح

ليلة عيد وأفراح…وعطر الشوق الفواح
ينثر شوقه الوردي…يالمهدي يالمهدي
ليلة عيد وأفراح

شع نور المهدي ابليله الفرحة بيها غمرتنه…واحنه ابحفلتنه انصب كاسات او نشرب خمرتنه
خمرتنه امن الحب الصادق وانكمل سهرتنه…اوما تحله القعدة ابغير اسمك يا شمعة سمرتنه
يا آخر هالانوار…ابراسي دارت افكار
اسمع شوف اشعندي…يالمهدي يالمهدي
ليلة عيد وأفراح

طرت لسامرة اعله احناح اشواقي اوأسأل عنك…تحديني الفرحة اويغمرني النور اليظهر منك
ما شفتك مولود ابمهدك جنك كوكب جنك…وارموشك جنهم طاووس ابريشه ايلون جفنك
يمك شفته اليوسف…حاير بيك اشيوصف
وقلك خلص عهدي…يالمهدي يالمهدي
ليلة عيد وأفراح

يم مهدك قعدت آيات اكتاب الله وقرآنه…تنثر أزهار ورشت فوقك ورد بألوانه
حتى الوردة اتقلك من نورك الله سوانا …وهذا العطر التشتمه الوادم من كثر أهوانه
من حبي الهذا النور…رازقني الباري اعطور
بيها اتفرد وحدي…يالمهدي يالمهدي
ليلة عيد وأفراح

وآنه ابهذا الموقف أتأمل إعجاز الباري …واملاك الدنية اعلى ايميني اتحوم وعلى ايساري
رديت اوياهم خطيت اسمك علقته ابداري…اشتاقيت اوحنيت لحسنك ذاك وشبت ناري
عفتك لحظه وحنيت…أرجع يمك ياريت
دموعي تجرح خدي…يالمهدي يالمهدي
ليلة عيد وأفراح

قاعد بالحسرة او اتنطر يوم التنهي اغيابك…واتعود امن الغيبة المرة الحضن اهلك واهدابك
تتكحل عين الشيعة ابشوفة عينك واهدابك…نتبارك بتراب التمشي اعليه وانبوس اترابك
هذا اتراب الجنة…يالمهدي واتمنه
لو تقبلني جندي…يالمهدي يالمهدي
ليلة عيد وأفراح