مكه و مدينه يحسين

مكه و مدينه يحسين …مكه و مدينه
تشهد  ابفضلك  يحسين … يبن الزجيه

حضرتك كعبه و بعد ترهه اعليها … أجر و  مثوبه
و  أستارها كلمن تعلق بيها … تنمحي اذنوبه
انجان مكه الناس تقصد ليها … بالعمر نوبه
احنه  الحضرتك يحسين … احنه  الحضرتك
كل عام نقصد ليها … يبن الزجيه

كلمن  الصورت  حضرتك خلاها … إقباله و  تفكر
يبصر الكعبة و ايعرف معناها … بس  ايتصور
مكه  الذي بيده القويه ابناها … من عالم الذر
بيده  حضرتك يحسين … بيده  حضرتك
هو  الذي بانيها … يبن  الزجيه

و اللي يطب الكربله و يتروه … بيها و  يواظب
ما  بين أبوفاضل و بينك هوه … ايشوف المواكب
تتمثل ابعينه الصفوه و المروه … و كل  المطالب
يذكر  المسعى يحسين …يذكر  المسعى
كلما سعى ابواديها … يبن الزجيه

و ابصحنك الحج انفرض أحكامه … من قبل  آدم
من هله المسلم ليه شد احزامه … اتلاقيه  يلملم
يغسل اذنوبه ابدمعته الهتامه … مو بير زمزم
لو شاف قبتك يحسين … لو شاف  قبتك
اتخبره قبرك بيها … يبن الزجيه.

و الناس لو ترمي بمنه اعله الجمره … حصوات  سبعه
طاعت الباري و أمر راعي القدره … حكمه لبسرعه
احنه  اعله فقدك دوم يبن الزهره … دمعه اعله دمعه
جمرة حزنه يحسين …جمرة حزنه
بدموعنه  نرميها … يبن  الزجيه

من  شاوطت  هاجر و تالي اتروت … هي و  ابنها
سوت  رباب ابكربله ما سوت … من جف  لبنها
لكن  أطفالك  من ضمها اتلوت … بس رحت عنها
محد سقاها يحسين …محد سقاها
من  فصحت برجليها … يبن الزجيه

اسواية الهادي بيك سر معناها … محد  ينكره
إبراهيم  بإسماعيل ما سواها … و اشتهر  أمره
و انجان ربه المهجته أبداها … هو اعله  أجره
مهجتك محد يحسين …مهجتك محد
من  القتل يفديها … يبن الزجيه

و انجان بس بإبنه الخليل الربه … ضحه امهجته
سموه ذبيح الله و لا من ضربه … لاحت  رقبته
إنت  لون  غيرك المرمر قلبه … ذوبت مهجته
سبعين واحد يحسين … سبعين  واحد
من  هاشم  امضحيها … يبن الزجيه