نار و جمر دليلي

نار    و   جمر   دليلي…من   فارقت   خليلي
عن   والدي   و   مصابه…يا  طوعه   سولفيلي

يا    طوعه   سولفيلي   روحي   ابهمها    محتاره
عطشانه   الأبويي   المات   أريدن  منج  أخباره
يطوعه  من  تركني  و  راح  قلبي  اتعذب   ابناره
يطوعه  اويه  الغريب  اتصير  صدق دنيانه  دواره
يا  طوعه  مو  هضيمه…هسه  أصبحت   يتيمه
عمري    انفقد   شبابه…يا   طوعه    سولفيلي

يطوعه  احجيلي  يم  الباب  اشدار بينج و  بينه
لمن   قال   لج   عطشان   نزلت  دمعته   ابعينه
غريب  أدري  و  عزيز  الروح  بالغربه منو  ايعينه
أوّدي   دمعتي  يا  ريت  يطوعه  و  بيها   تروينه
من     طول     اعله     بابج…يتألم      بعتابج
ظهره    انحنه    ابعذابه…يا   طوعه    سولفيلي

بالغربه    العزيز    ايموت   تربي   اعيونه    لحبابه
و  أبويي المات دون اوداع غريب ووحده  بمصابه
راح و جنت أظن يرجع البعد ما حاسبها  احسابه
عشت  بظنوني  هاي  أيام  أثاري اظنوني  جذابه
يرجع   جنت   أريده…و   ينادي   يا    حميده
و   آنه   أركض   الجوابه…يا   طوعه  سولفيلي

إناء  البيه  شرب بيه ماي ردت يا طوعه  أشوفنه
قلت  بلكي  نفس  بيه  ظل  من  عنده و أشمنه
ما  خلالي  يمج  نور  و  لو  ذكره  و  عطر  منه
وين   اعمامته   و   ثوبه   بيهن   ردت   أذكرنه
يا    ريحت    الحبايب…قلب   العليها    ذايب
أشتم     عطر    ثيابه…يا    طوعه    سولفيلي

إخذيني اعله قبره اهناك أريد أقعد و أنوح اهواي
و  أقله  يا  غريب  الدار صدق محد رواك  ابماي
أحط اترابه فوق الراس يطوعه أمشي تعاي  اوياي
راي   الفاقده   الغالي   ما  يبقه  ابحزن   هالراي
من    أوصل    الترابه…أحجي   ابدمع    عتابه
و   أحجيله   عن   غيابه…يا  طوعه   سولفيلي