ثارك يبن عمنه

ثارك  يبن عمنه…يا مسلم  إيهمنه
و إنطالب إبدمك…لو ينسفك  دمنه

يا مسلم يبن عمنه هذولي إحنه بني  غالب
كل  حرب النطبها إتصيح إجو اولاد أبو  طالب
حرارة نار ثاراتك قلبنه إوياها متسالب
إبقلبنه  نحرق  النيران و إجينه إبدمك  إنطالب
عنك فلا نرجع…هم ننسه  تتوقع
لا و الله لو نوقع …لو ينسفك دمنه

وفاءك  إلنه يا مسلم خجل من عنده كل  إنسان
الحد قطع النحر تهتف إرجعوا عن أرض كوفان
شنهو إتظن جزه إحسانك طلب ثارك جزه الإحسان
وفيت  إويانه  يالحزنك غضب ما يلهمه  البركان
هذا الغضب يظهر…بالطف عله  العسكر
ناره تهيج أكثر…لو ينسفك  دمنه

صدق  بالكوفه يا مسلم تنازف و إنسفك  دمك
لجن  ميضيع فجاره و لا والله  ليهمك
عيب  إعلينه ننسه الثار دمك دم بني  عمك
و  كل جسم اليقع نذكر من القلعه رمي  جسمك
عالجمره  تتلهف…موعدنه أرض  الطف
لتظنه  نتأسف…لو  ينسفك  دمنه

نقسم  لك يبن عمنه و حق الخالق و  عرشه
إبضربه الما نثنيها نصيب إعداك  بالدهشه
نخلي  كل عدو لو مات تبقه إعظامه  مرتعشه
إبقبره  إنصير له كابوس أشد من ليلة الوحشه
إنخلي العده تندم…جيه غدرت إبن العم
و  إنفجر إجهنم …لو ينسفك  دمنه

نجوم الظهر هالجلمه نخلي الناس  تسمعها
مده الأزمان لو تسأل إلنه إيصير  مرجعها
حيث  إحنه إبظهر عاشور رماح الموت نرفعها
شهب  و بعلية الميدان ما ينرفض  موقعها
تنزل  عوالينه…بصدور أعادينه
ميهمنه  تدرينه…لو ينسفك  دمنه