شاعر: جابر الكاظميرادود: باسم الكربلائي
حضرنه اوياك يا حيدر….. نقيم النوح و نخبرك
صبر أيوب ما يوصل….. عشر معشار من صبرك
حملت امصاب………….. يداحي الباب
*****
رسول الله يبو الحمله….. بشدد و حروب شاركته
مثل هارون من موسى….. جنت وياه و انصرته
انهدم ثلثين من حيلك….. يحيدر لمن افقدته
على الكاهل شلت نعشه….. حزين و بيدك ادفنته
ذهيل الكون و اتعجب….. على الصبر الذي اصبرته
و لا مرسل قدر يحمل….. مرار الي تحملته
يبو الحسنين و الليلة….. مزجت اللآه بالحسرة
جفن مجروح يا حيدر….. تصب ادموع عالزهرة
و دليلك ذاب………….. يداحي الباب
*****
ابوسع صدرك رعاك الله….. يمن صدرك سفينة نوح
اجت ليك المحن طوفان….. و تباريها ابدمع مسفوح
يحيدر فرقة الزهرة ….. خذت منك بقايا الروح
بعد ما ظل قلب عندك….. يشيل مخلفات النوح
ابدليلك مو جرح واحد….. تشده و يندمل و يروح
لجن هن يا علي تكمن عليك….. اجروح فوق اجروح
الجرح لو سال ما يضمد….. يبو الحسنين بالدمعة
و لا بالآه يتجبر….. ضلع مكسور للبضعة
ضلعها انصاب………….. يداحي الباب
*****
يحيدر روحك اللوعات….. غدت تاخذها واتردها
و على مفرق طريج الظيم….. مهجتك صار موعدها
حزين و عنك الزهرة….. مشت و الموت قايدها
أخذها البين من عندك….. مثل ما أخذ والدها
الوديعة ماتت ابهمها….. و مرار الضلع ضامدها
جزت و الموت حاديها….. و بياب النوح ترصدها
هجوم القوم عالزهره….. يهز الكون بمصابه
يحامي الجار لا تنشد….. على البسمار و اصوابه
صدرها انعاد………….. يداحي الباب
*****
حزينة و موضع البسمار….. ختم صفحة مصايبها
و هجوم القوم صوب الباب….. فتح أبواب لوعتها
قضت بنت النبي الهادي….. تفت الصخر حالتها
لاجن يا علي دونك….. وصية الزهرة قالتها
ابهداوة ليل تدفنها….. لون حضرت منيتها
ومعاني الغضب عالأجلاف….. ظهرت من وصيتها
ادفنتها ابليل و الوادم….. سحاب النوم يحجبها
عجيبة اشلون للبضعة….. ثرى الأموات غيبها
بدرها غاب………….. يداحي الباب
*****
ادفنت بضعة رسول الله….. ورجعت الدارك ابعبره
وصلت للباب واعيونك….. غدت للحايط اتنظره
اذكرت يوم الذي هجموا….. القوم وعصروا الزهره
وذكرت الباب و البسمار….. و ضلعها الطاهر وكسره
غدت تتهامل ادموعك….. تجر حسرة بأثر حسره
و قلبك مثل نار الباب….. غدت جمراته مستعره
تصد للباب و اعيونك….. مدامع ظيم تجريها
الك جمرات ما يقدر….. مسيل العين يطفيها
ابدمع سجاب………….. يداحي الباب
*****
طغا ليك الحزن لاجن….. دليلك بالصبر ينضح
و جمرات الرزايا اعليك….. غدت من كل كتر تلفح
عجيبة اشلون الك ينبض….. قلب بالنايبة امجرح
و الأعجب نشوف الليث….. حزين و دمعته تسفح
عجيبة اشلون يا كرار….. المصيبة ابمهجتك تمرح
والأعجب أسير الظيم….. و الهم و الحزن تصبح
يبحر الزود يا حيدر….. ترجف الموت صولاتك
حزين تبات يا وسفة….. تسيل ادموم عبراتك
اشيفيد اعتاب………….. يداحي الباب
*****
غضب يالما تهاب الموت….. تدوس الخوف باجدامك
أسد تتعمد الكلفة….. يهز الكون صمصامك
اشعلامك يا علي الليلة….. غريج ابموجة آلامك
و أشوفك شابج العشرة….. من اهمومك على هامك
مصيبة ابعين بارينا….. احتسبها ابذمة أيامك
لون منك جرت عبرة….. تهيج ساكن أيتامك
الك أيتام ما تقدر….. تشوف ادموع بعيونك
يحامي الجار أيتامك….. كهف بالظيم يردونك
اشحسبت حساب………….. يداحي الباب
*****
مصدر النقل: موقع القصائد الولائية
2مشاهدة