بعد انتظاري حان افتخاري

بعد انتظاري…حان افتخاري
يولادي برباتي اتوافوني

من عادة لسان الأم عذوبة ايفيض تعبيره…قلب العدها يتوصف بكبر الدنية تصويره
و صوت أم البنين الصاح خل أهل الوفه بحيره…حلم الراود اعيوني أريد اليوم تفسيره
سهري و حناني…فرض امتحاني
أشرط دعاني…موعد ضماني
و حسين أميري…اتملك ضميري
حاضن وجوده اصبي اعيوني

منتظرة و أعد اشهور و أحسب بالليالي احساب…و ثوب اظنوني أذبنه و ألبس للفخر جلباب
و العزة تريد احزام بغير الهمه ما تنجاب…زلمه اللي يقبل الذلة بين الزلم ما ينهاب
يثبت وجوده…يوفي بعهوده
ساعة وروده…يضمن خلوده
و العزة شتلة…بالنخوة تعله
و الذلة مو ثوبي اتعرفوني

و آنا ببيت أبوي و طيف نشف ناظري اليدمع…جدامي قمر و انجوم قامت تسجد و تركع
تفسير الحلم لني نور من الظلام أطلع…و كرمني الجليل ببيت من جنة عدن أوسع
اتحقق مرامي…زاد احترامي
بحيدر إمام…اتعله مقامي
و الباري سرني…بيكم جبرني
و أم البنين ايسموني

حيدر من تقدم لي و بجاله ارتفع قدري…جنت بنذر مطلوبة و لازم اوفي بنذري
و أدري ينجرح قلبي و أدري مو سهل صبري…باجر من علي الكرار شنهي بالحشر عذري
يصعب جوابي…يشتد حسابي
لا يا شبابي…هين مصابي
يوم الجبتكم…فدوه انذرتكم
و اعليكم الواجب طيعوني

روضة من الوفه و الطيب كل وقته القلب أمكم…و ليل انهار بحسابه شريك اوياكم ابهمكم
أطلبكم سهر ليلي و ما يحتاج أحشمنكم…و بيا ضي وجه تدرون مرهون بنزف دمكم
و بزودي أنادي…هذا اعتقادي
صبري و جهادي…آخذ مرادي
و بقلبي حسره…لو جنتو عشرة
ما ظني بهالراي اتخلفوني