لا تبجين و الدمعه اعله خدج

لا  تبجين…و  الدمعه اعله خدج
ولدج  اهواي…مو  بس هُمه ولدج
مو  فقط أربع بنينج…تارس العالم حنينج
لا   تبجين…لا  تبجين

ليش  يا دنيه الترافه…اعيونج اتغّيم حسافه…تمطر اعتاب
آنا جيتج حته أبشّر…ما أريد بدمعج أذكر…ضلعي و الباب
آني و انتي بكل محرم…نلتقي لو صار مأتم…يروي المصاب
ما أفوت آني اعله مجلس…إلا آني اوياج نجلس…بين الأحباب
و اتسمعين كل أهل المجالس…شكراً اتصيح يمربية الأشاوس
هالوعد  بيني و بينج…تارس العالم حنينج
لا   تبجين…لا  تبجين

و آني العندي الحال أصعب…صرت الدمعه مرحب…لازم اتموت
دمعه من العالم أكبر…آني جايب باب خيبر…إلها تابوت
تندفن و البسمه تطلع…و أحجي و الأيام تسمع…نبرة الصوت
عالصراط اللي يحبج…لو تأشرين بأصبعج…سالم ايفوت
عالنسوان  تبقين الأميره…ليش الخوف و الدمعه الجبيره
و  الأسد  حامي عرينج…تارس العالم حنينج
لا   تبجين…لا  تبجين

يا  سمه و ليل بحزنها…غافية انجوم بحضنها…و القمر نام
حزنج يذكرني كلشي…و أذكر بتشييع نعشي…رمي السهام
ما أريد الدمعه تنزل…دمعة الغالين تكتل…كل الأحلام
ما امقصره اوياي انتي…راحت أمي و أمي صرتي…و أم الأيتام
محتاجين قطره و صرتي غيمه…يا نبوع ماي و يسقي هيمه
غاليه  عالمشترينج…تارس العالم حنينج
لا   تبجين…لا  تبجين

ما أشوفج آنا يمكن…و السهام بعيني تسكن…طافيه العين
من أريد أمسح دمعتج…ايدي ما توصل وجنتج…ما كو جفين
اتوقعوني أبو فاضل…و انتي صحتي مو الكافل…و الأصح وين
ريحة الحنيه فاحت…و المشاعر كلها صاحت…هذا الحسين
ما أجازيج يالصرتي لي شمعه…و المطلوب دين أمه اشيرجعه
كون  أوفّي بروحي دينج…تارس العالم حنينج
لا   تبجين…لا  تبجين

ليش  حزنج يمه خيّم…چنه دخان المخيم…يشده البال
اشلون يحمل گلب زينب…و الدمع خرزات كهرب…عالوجن سال
لو دمع لو غيمه طاحت…لو جزيره و بيها تاهت…كل الأطفال
ما كو خط رجعه بسفرهم…و الهوه ماسح أثرهم…فوگ الرمال
و آني اوياج نحضر بالزياره…انوزع امراد و انواسي الحياره
ما  أريد  أسمع ونينج…تارس العالم حنينج
لا   تبجين…لا  تبجين

خاف يمه امقصر آني…يخطر ببالج ثواني…هذا الاحساس
جيشهم شبعّته ذله…و الفرات و مايه كله…بجدمي ينداس
مو قضية ماي و أغرف…انتي أكثر وحده تعرف…شنهو عباس
النهر  أگدر أقسمه…للمخيم نص أقدمه…و نصه للناس
لو  تردين زمزم هم أجيبه…و العباس سهله مو عجيبه
المهم  عالي جبينج…تارس العالم حنينج
لا   تبجين…لا  تبجين

يا مربيه أسباع للطف…زلم گام ايخضر الجف…ينشف العيون
عوضج  ربك حبايب…ترسوا الدنيه مواكب…ما يگصرون
لو علينه الدنيه تفتر…و المصايب صارن أكثر…شده و اتهون
اجروحنه تگره الجروحج…فاتحه ازغيره اعله روحج…تگلب الكون
ما  تگصرين لو نرفع ادينه…و المحتاج لو مدلج يمينه
يلگه  حاجاته  بيمينج…تارس العالم حنينج
لا   تبجين…لا  تبجين

لون باب الدنيه ينسد…نلگه بابج واسع اشگد…دنيه كبره
حته  لو غيّم عمرنه…فاتحة تسهيل أمرنه…اعليج نقره
و  احنه نتمنه نظرتج…طلب قدمنه الحضرتج…ردنه نظره
عدنه غايب طال بُعده…ننتظر صار النه مده…سهلي أمره
للموعود  ادعي يالحنينه…لو بالطيف و يسير علينه
انحلفج  بدمعات عينج…تارس العالم حنينج
لا   تبجين…لا  تبجين