حنتك حنتك هاك إخذ حنتك

حنتك حنتك ….. هاك إخذ  حنتك
يالمجبل على الجنة… وانه بدماك أتحنه
هاك   إخذ    حنتك
*****
چني بعصرية عشر من عاشور……  بالغاضريه
وشفت  الضحايه تنور ظنيت بدور …….. فوگ  الوطيه
ورمله على بنها تنادي والعين تفور ….. رحت من  إديه
مهجتك مهجتك…. دمي  لبمهجتك
وجروحك  النزفنه…… وانه بدماك أتحنه
هاك   إخذ    حنتك
——
عيني  العمى ولاچنت اشاهد حالة …. رمله ويه  بنها
تصرخ  وصرختها  بلهيب الحسرات…… مشعل  حزنها
الله يعين الذاخره للشدات…. وانگطع ظنها
عمتك عمتك…. خل تظل  عمتك
تجذب عليك الونه…. وانه بدماك اتحنه
هاك   إخذ    حنتك
——
ماچنت  شايف نار فگد المحبوب ……. بالطف  شفتها
من شاهدت رمله على جسام تلوب …… روحي امردتها
نوبه  تعثر نوبه تگع عالمصيوب….. من  نايبتها
زفتك  زفتك……  عرسك  وزفتك
بدار الخلد وتهنى…. وانه بدماك اتحنه
هاك   إخذ    حنتك
——
ما چنت شايف والده تتمثل ……مصرع  ولدها
بس گلب رمله على الشباب تحمل…. سهمه  الضهدها
وشافت ولدها بالسيوف إمثل…. وحاچت  چبدها
حسرتك حسرتك …… حزنك  وحسرتك
لب  الگلب  صابنه… وانه بدماك اتحنه
هاك   إخذ    حنتك
——-
وشلون  حنيه ضلوعها محنيه …. وحسرة  گلبها
بالظلوع وروحها المبليه…. تشغر لربها
وعيوني مثل عيونها مدميه…. ينزم  مصبها
نومتك  نومت…  فگدك  ونومتك
ظلع  أمك  الكسرنه…. وانه بدماك  اتحنه
هاك   إخذ    حنتك
——-
ما  چنت شايف معرس ويتهنه….. بچاس  الشهاده
ومن شفت جاسم بالطفوف تحنه… بدم  السعاده
وگلبي بصبر رمله تاكد ظنه….. وزاد إعتقاده
طيحتك  طيحتك…… عالترب  طيحتك
وصبري  بوفاك تچنى… وانه بدماك اتحنه
هاك   إخذ    حنتك
——
وشلون شوفه شفت رمله وجسام ….. فگست  عيوني
من  چانت  تودعه تگله بسهام…. فگدك رموني
وإنگطع  گلبي بينك وبين الشام…. ساعه  وسبوني
جثتك  جثتك…. من تظل  جثتك
وبلا دفن يامچنه….. وانه بدماك اتحنه
هاك   إخذ    حنتك