من بعد عزتي

من  بعد عزتي…ضيعوني  إخوتي
لا  خيم لا خدر…بويه لا تعتذر
ضيعوني إخوتي

هاي الذي إتندبك يعقد  الوله
تعرفها و الصوت إله إبقلبك  صله
زينب يحيدر هاي و بكربله
متحيره  بأطفال و بعايله
صاحت  و نادتك هاك إخذ  صيحتي
بويه من الأهل…بويه ضاع  الأمل
ضيعوني إخوتي

يا  بويه  هذا اليوم خلصوا جتل
و  ما  سلم من السهم حته  الطفل
و  ما  جنت أقول الخيل لينه تصل
وصلت  الخيل  و شفنه أبشع فعل
فرهدوا  للخيم  فرهدوا  خيمتي
العائله  إتسلبت  …خيمتي إتلاهبت
ضيعوني إخوتي

من  خيمتي النار إعله كل الخيم
نار  و دوت هجت أطفال و  حرم
و  آنه يبويه اللي شطت بالألم
و شعندي غير النخوه لأهل الشيم
و  لا إخو اللي سمع صيحتي و  نخوتي
صوتت حشمت…امن إخوتي ما شفت
ضيعوني إخوتي

إيظل  حيل بيه بعد خوف و  ضمه
و  إمصايب  إخوه إتخضبت بالدمه
و  أطفال  إخوي الغدت متيتمه
و  نار الذي إتلاهبت  بمخيمه
و عايله إمحيره هم مثل حيرتي
حيلي  وينه  بعد…بويه و بهالشدد
ضيعوني إخوتي

ودعت  الخوه جثث فوق الثره
أمهشمه  إضلوع  و جثث متوذره
إتركت  الخيام الغدت  متوجره
أحجي  البعايله المتطشره
و آنه حيلي نحل و إفقدت  همتي
بويه  حيلي  ضعف…إبكربله يا وسف
ضيعوني إخوتي

و  هذا يبويه ليل خوف و  خطر
و آنه أرد ألم عيله يفارس مضر
نايم كفيل العايله عالنهر
بويه  و راعي العايله ظل وذر
قلي  يا حيدره إلتزمي إبعيلتي
و عيلته إتطشرت…و زينب إتحيرت
ضيعوني إخوتي

و ظليت ألم أطفال  متعذبه
و إعيال مذهوله إمن النايبه
ألتفت ألقه أطفال  متغيبه
أرجع  لعد كل خيمه  متلاهبه
ألقه  بيها  طفل و أركض  إبلوعتي
و  لا  مساعد إلي…ابهالتعب يا علي
ضيعوني إخوتي

هذا  طفل  ناره تشب بالجفن
ذاك طفل بالخيل ظل منهشم
جا  بعد شفقد يا علي و  شألم
نار و عطش يا علي و خيل و  يتم
بويه  إنت  إشقلت بينت  حالتي
العيله  متخوفه…إو  حيرتي ابهالصفه
ضيعوني إخوتي

طفله  إفقدت شاطت إبحرقة  قلب
لاوين  راحت بالدموع  التصب
أسأل و قالوا مرت إعله الدرب
و  لن عدو إيدليني غده  البلحرب
أنشد  إمن العده الشامته  إبذلتي
هذا حكم القدر…هذا فعل  الدهر
ضيعوني إخوتي