عذبونه يا محمد

عذبونه  يا  محمد ….و الضلع و الباب يشهد

راوانه  الزمان أحداث من نذكرها  نتألم
و  من  ننعاين التاريخ جم صفحه صبغها  الدم
أبو جهل و أبو سفيان غير الجهل ما  تفهم
و يا شخص الذي بيهم عن رغبة ضمير  أسلم
غير  الذبح الأمه قلي اشنفع  اشقدم
و  من أركان هذا الدين جم ركن الذي اتهدم
و الحاقد أبو سفيان من مات النبي  اتبسم
لو  ينقلب مو عجبه طبعه اعله البغي  امعلم
من  ربه هبل خجلان و بإسلامه  يتندم
العقرب  حته لو ماتت بيها ايظل خبيث  السم
كل  فرد سلم أحقاده….اتمثل ابولده و  أحفاده
مو  صوج الغصن ما يثمر  الزينه
صوج  الشجره و الأكثر صوج  الطينه
و  الجروح اشلون تنعد…. و الضلع و الباب  يشهد

لا  تطهر و لا تشفه اكلوب البلحقد مرضه
و  ناس العدت الباطل بالحق أبد ما  ترضه
و  يا خير النبي ايقدمه هيه اتحاربه و  ترفضه
و  تنصاع الحجي الشيطان و دين الخالق  اتغضبه
من  شافت رسول الله بشر و أعلن  النهضه
جم واحد نذل قامت ضد المصطفه  اتحرضه
و اعله النبي و أصحابه حصار الرادت اتفرضه
ظنهم يفني عزمه و هذا الموقف ايبهضه
ابجدار  الكعبه هالميثاق ابغرور اتعلقت  عرضه
لاكن ما نفع كل شي ذبت و آكلت  أمضه
إنظر الموقف جهلهم….بالعجل فسد شملهم
و بس اسم الجلاله بقه اعله الورقه
و تاليها حلمهم أرضه  اتمزقه
شفنه منهم حقد أسود….و الضلع و الباب  يشهد

من  بعثت  رسول الله اتجسد واقع الثوره
يوم اللي هبط جبريل بأمر الخالق  ايخبره
و ناده يا نبي الرحمه سبح ربك و إقره
و  انهض و انقذ الأمه من أوضاعها  الخطره
و لمن سمعت الكفار رادت للنبي اتحذره
لاكن  شافته امصمم لازم ينهض بأمره
ابيت النذبه مجموعين و الفكار متحيره
و  ابليس من إجاهم كَال آنه أنطيكم  الفكره
خلي  كل  قبيله اتجيب من عدها زلم عشره
و  تهجم كلها فذ هجمه حته ايضيع دم  نحره
نكروا لاكن الباري يظل خير المكر مكره
طاعوا  إبليس من إجاهم….بالدجل غرهم  غواهم
و اتمثل سراقه ابصورته و شكله
علمهم الخطه اعله النبي و  قتله
و  انغذر  هادي المؤيد….و الضلع و الباب  يشهد

مكرت و المكر ما فاد و فشلت خطة الأشرار
و اغترت بقوتها و جهلت قوة الجبار
من عدهم عذاب و ضيم شاف الصادق  المختار
و  شفعلت بأصحابه أهل الغدر و  الكفار
أبو ذر اشجره ابحاله سميه و ياسر و عمار
لمن قرر الهادي يهاجر للمدينه  اشصار
قله  اتبات  بفراشي اشرايك يا علي  الكرار
و  حيدر غمرته الفرحة شوف الوفه و  الإيثار
و  رجعت خايبه العدوان لمن هجمت اعله  الدار
و من تبعت رسول الله شنهي الشافت اعله الغار
اندهشت و شافت القدره….ولت و رجعت ابحسره
فرسان العرب جاوين  قدرتها
بيت العنكبوت من  إرادتها
و الحلم كله تبدد….و الضلع و الباب يشهد

اشننشد  يا ألم قلي من خلفت أبو  سفيان
ابيوم الودع الأمه الهادي سيد الأكوان
الجانت تدعي الأصحاب انقلبت علنت العصيان
اجتمعت بالسقيفه اتريد جاه و منصب و  تيجان
وصي  بعد النبي تدري حيدر داحي  البيبان
و ليش ابحجه الشوره تغصب حق علي  العدوان
لا تستغرب امن اللي جانت تعبد  الأوثان
ذرة  شرف ما عدها لا غيره ولا  وجدان
تطلب  من بدر ثارات و منها ابكل قلب  نيشان
منهم اشنند و نعدي….و لسه بينه العله  تدي
لليوم  الأثر موجود و ما  ينزاح
دم  شيعة  علي و بيا شريعه  انباح
ابيا  ذنب حقنه تفرهد….و الضلع و الباب  يشهد

شجرة حقد ملعونه لعنها الباري  بكتابه
و  باجر كل شخص منهم لازم ياخذ  احسابه
و  ناس التدعي و اتقول جانت للنبي  أصحابه
عليمن حاربت أهله انقلبت ليش  بغيابه
الدار الزهره من هجموا عليها اندفع  هالبابه
لاذت  لاكن المسمار ضلع الحسن صابه
و قامت تصد المحسن و الدمعات سجابه
ومن دفعوا إبن ملجم يغدر علي  ابمحرابه
الفجر و اتخصب ابدمه و قام ايلوج بصوابه
و  شفنه جم مصاب الصار ابغيبت علي و  امصابه
ابيا ذنب جبد أبو محمد….يا خلق بالسم  تمرد
و  ابطف كربله حسين انذبح  عطشان
و زينب عالهزل مسبيه  بالبلدان
اتصيح يا عباس الأمجد….و الضلع و الباب  يشهد