إمامي إبساعة المحشر أندبه إبشدتي يحضر

إمامي إبساعة المحشر…أندبه إبشدتي يحضر
شفيعي موسه بن جعفر…يحاميني…ينّجيني
شفيعي موسه بن جعفر

إمامي البنفس حبه يشاركني…أعاني من ذنوبي إشلون يتركني
أندبه من يصير إحسابي يدركني…بيميني يسلم إكتابي و يباركني
فديته بكل ثمن غالي…و أقول يحقق آمالي
حسابي إبفضله يتيسر…يحاميني…ينّجيني
شفيعي موسه بن جعفر

كريم النفس طبعه اتشوف آثاره…و مرسوم العطاء إبوجه خطاره
و عن باب الحوائج تشهد أخباره…كراماته إبفضلها تحجي زواره
يزول إهموم اليزوره…ترد من عنده مسروره
و لا من شانه يتعذر…يحاميني…ينّجيني
شفيعي موسه بن جعفر

قبر موسه إبن جعفر كلمن إيزوره…إقباله للكرامه تنرسم صوره
يا دار الزهت و أصبحت معموره…و يا دار البقت بالعار مهجوره
خطابي كلمن إيسمعه…هاي الموعظه إتنفعه
يفوز البيها يتأثر…يحاميني…ينّجيني
شفيعي موسه بن جعفر

هارون الطغه و إتجبر إبعصره…وين أصبح غروره و سلطته و قصره
خل يقعد يشوف الكاظم و قدره…ملايين التزوره و تنحني القبره
إجت مشايه ملهوفه…تلبي و تسعي و إتطوفه
أمل و بكل قلب يكبر…يحاميني…ينّجيني
شفيعي موسه بن جعفر

اليتلاله إعله وجه نور إيمانه…هذا الله يحبه و مرتفع شانه
الكاظم معجزه بتقواه و إحسانه…و يا مسجون غيّر فكر سجانه
بدعاءه إدموعه هماله…صبور و ما شكى حاله
بحبه قلبي يتنور…يحاميني…ينّجيني
شفيعي موسه بن جعفر

أريد أسأل و أهل المعرفه يسمعون…مثل موسه إبن جعفر صار يا مسجون
رغم قسوة عدوه الطاغيه هارون…يقول السجن رحمه و الفرج مضمون
مصيري الموت ينتظره…و لا ساعه جزع صبره
هداني إشلون يتصبر…يحاميني…ينّجيني
شفيعي موسه بن جعفر

الكاظم من أقصده و أوقف ببابه…عظمته إتقودني و أسجد عله إعتابه
و ياخذني الشعور إبدمعه سجابه…و أدخل يم ضريحه و أذكر إمصابه
عله إخدودي الدمع يجري…إمامي إبنيتي يدري
أريده إبشدة المعبر…يحاميني…ينّجيني
شفيعي موسه بن جعفر